Ավինյան․ Չցանկանալով խախտել անմեղության կանխավարկածը՝ քննությունից ակնկալում եմ լրիվ և բազմակողմանի բացահայտում

PanARMENIAN.Net - Երևանի փոխքաղաքապետ Տիգրան Ավինյանը ֆեյսբուքայն իր էջում, անդրադառնալով քաղաքապետարանում Հակակոռուպցիոն կոմիտեի վերջին գործողություններին, գրել է, որ քննությունից ակնկալում է լրիվ և բազմակողմանի բացահայտում։

«Երևանի քաղաքապետարանում Հակակոռուպցիոն կոմիտեի վերջին գործողությունները ևս մեկ անգամ գալիս են հիշեցնելու, որ պետական, համայնքային և, առհասարակ, հարկատուների հաշվին պաշտոն զբաղեցնելն ինչքան պատվաբեր է, կրկնակի էլ պատասխանատվության բաժին է ենթադրում:

Չցանկանալով խախտել անմեղության կանխավարկածը՝ քննությունից ակնկալում եմ լրիվ և բազմակողմանի բացահայտում. սա է պահանջում Երևանի և երևանցու շահը: Միևնույն ժամանակ սթափության կոչ եմ անում քաղաքապետարանի և համայնքային կազմակերպությունների անխտիր բոլոր աշխատակիցներին՝ հորդորելով իրենց ջանքերը ծառայեցնել բացառապես մայրաքաղաքին»,-ասվում է գրառման մեջ։

Ավելի վաղ հայտնի դարձավ, որ Երևանի քաղաքապետարանի ևս 2 պաշտոնյա է ձերբակալվել։ Հակակոռուպցիոն կոմիտեում քննվող քրեական վարույթի շրջանակում ձերբակալվել են քաղաքապետարանի աշխատակազմի նախկին ղեկավար Սեյրան Մեջլումյանը, ճարտարապետության և քաղաքաշինության վարչության պետի տեղակալ, վարչության պետի պաշտոնակատար Դավիթ Դալլաքյանը։

Ավելի վաղ 2 ամսով կալանավորվել է Երևանի փոխքաղաքապետ Գևորգ Սիմոնյանը ։ Նա ձերբակալվել էր մարտի 10-ին։