ՌԴ–ում ՀՀ դեսպանին կանչել են ԱԳՆ և բողոքի նոտա հանձնել՝ «մի շարք ոչ բարեկամական քայլերի» մասով

PanARMENIAN.Net - ՌԴ–ում ՀՀ դեսպան Վաղարշակ Հարությունյանին կանչել են երկրի ԱԳՆ և բողոքի նոտա ներկայացրել Երևանի «մի շարք ոչ բարեկամական քայլերի» վերաբերյալ։ Այդ մասին ասվում է ՌԴ ԱԳՆ հայտարարության մեջ։

Նշվում է, որ ՀՀ ղեկավարությունը վերջին օրերին մի շարք ոչ բարեկամական քայլեր է ձեռնարկել, որոնց թվում են՝ Հռոմի ստատուտը վավերացման ուղարկելը, վարչապետի տիկնոջ այցը Կիև, որտեղ նա հումանիտար օգնություն է հանձնել «Կիևի նացիստական ռեժիմին», ԱՄՆ մասնակցությամբ զորավարժությունները ՀՀ տարածքում։

Նշվում է, նաև, որ վերջին շրջանում ՀՀ պաշտոնական շրջաններում և քաղաքական վերնախավում որոշակի կասկածներ են հայտնում ՀԱՊԿ շրջանակում և ՌԴ հետ երկկողմ հիմքով դաշնակցային կապերի նպատակահարմարության, ինչպես նաև Մոսկվայի, Երևանի և Բաքվի եռակողմ հայտարարությունների կրականացման վերաբերյալ։

«Բողոքի նոտա է հանձնվել, որտեղ մատնանշված է ՌԴ ԱԳՆ պաշտոնական ներկայացուցիչ Մարիա Զախարովային հասցեին ՀՀ Ազգային ժողովի նախագահ Ալեն Սիմոնյանի վիրավորական հայտարարությունների անընդունելի լինելը»,–ասվում է հայտարարության մեջ։

Բացի այդ, ՀՀ դեսպանին է փոխանցվել ռուսական կողմի մտահոգությունը սեպտեմբերի 7-ին Հայաստանում բլոգեր Միկա Բադալյանի և «Սպուտնիկ Արմենիա» ռադիոկայանի սյունակագիր Աշոտ Գևորգյանի ձերբակալության կապակցությամբ:

Միևնույն ժամանակ նշվում է, որ ՌԴ–ն կշարունակի ջանքեր գործադրել, որ Հայաստանի և Ռուսաստանի բոլոր պայմանավորվածությունները կատարվեն:

Նշվում է, որ Մոսկվան ելնում է այն հանգամանքից, որ Ռուսաստանը և Հայաստանը մնում են դաշնակիցներ, և հարաբերությունների զարգացմանն ուղղված բոլոր պայմանավորվածությունները կիրականացվեն ի շահ երկրների ժողովուրդների:

«Ռուսական կողմն առաջիկայում ևս բոլոր անհրաժեշտ ջանքերը կգործադրի այդ նպատակով»,–ասվում է հայտարարության մեջ։

ԱԺ նախագահ Ալեն Սիմոնյանն ավելի վաղ արձագանքել էր Ռուսաստանի ԱԳՆ ներկայացուցիչ Մարիա Զախարովայի ավելի վաղ արված հայտարարությանը, որ իր հայտարարություններն անվանել էր «բռիության եզրին հասնող մի ինչ-որ բան»:

«Ես չեմ պատրաստվում արձագանքել ինչ-որ գերատեսչության ինչ-որ քարտուղարուհու, որը, կարծում եմ՝ իմ մակարդակը չէ: ԱԳՆ կա դրա համար, արտաքին բաժին կա, թող իրենք արձագանքեն: Ես չեմ համարում, որ ես ու ձեր նշած մարմնի բաժնի պետի տեղակալը նույն մարդն ենք, որ ես խոսեմ: Թող ինքն իր դարդերով տապակվի», - ասել էր Սիմոնյանը։