Ռուսական Կարմիր խաչն Աղդամ-Ասկերան ճանապարհով օգնություն է ուղարկել Արցախ

PanARMENIAN.Net - ՌԴ կառավարության նախաձեռնությամբ, Ադրբեջանի Կարմիր մահիկի և ռուսական Կարմիր խաչի համագործակցությամբ, ռուսական կողմը 1 բեռնատար հումանիտար օգնություն է ուղարկել Լեռնային Ղարաբաղ, հայտնում է ադրբեջանական APA գործակալությունը։

Բեռնատարի մուտքը Լեռնային Ղարաբաղ նախատեսում է Աղդամ-Ասկերան ճանապարհով։

Բեռնատարն անցել է ռուս-ադրբեջանական սահմանը ժամը 14:30-ին։

Լաչինի միջանցքն ադրբեջանցիները փակել են 2022-ի դեկտեմբերի 12-ից։ Հուլիսի 26-ին ՀՀ-ն մարդասիրական մոտ 400 տոննա օգնությամբ շարասյուն է ուղարկել Արցախ։ Երևանից դեպի Արցախ ուղևորվող 19 բեռնատար մարդասիրական օգնությունը մինչ օրս Կոռնիձորի սահմանային հատվածում է, որոնց ավելացել են նաև Փարիզի և Ֆրանսիայի շրջանների ուղարկած հումանիտար բեռով բեռնատարները։

Ադրբեջանի Կարմիր մահիկի կողմից Աղդամի ճանապարհով դեպի Արցախ ուղևորվող երկու բեռնատար հասել է Աղդամ– Ստեփանակերտ ճանապարհին։Բաքուն հայտարարել է, թե այդ բեռնատարներում 40 տոննա ալյուր է Ստեփանակերտի բնակիչների համար։ Ադրբեջանի ԶԼՄ–ների համաձայն, նրանք բանակցում են ռուս խաղաղապահների հետ և վրաններ են տեղադրել ճանապարհին։ Արցախցիները կտրականապես դեմ են այդ տարբերակին և հայտարարում են, որ այդ ճանապարհով բեռներ չեն ընդունի։Ադրբեջանի նախագահի վարչակազմի արտաքին քաղաքականության բաժնի պետ Հիքմետ Հաջիևը հայտարարել է թե Աղդամով ճանապարհի բացվելուց 24 ժամ անց կբացվի Լաչինի միջանցքը: