Գործարար Կարեն Վանեցյանը հայտնել է, որ Մոսկվայում է և չի ձերբակալվել

PanARMENIAN.Net - «Օլեյնա» ապրանքանիշի սեփականատեր Կարեն Վանեցյանը, որի ձերբակալման մասին տեղեկություններ էին տարածվել, հայտարարել է, որ ինքը Մոսկվայում է և չի ձերբակալվել, հայտնում է ՌԲԿ–ն։

Ավելի վաղ տեղեկություններ էր տարածվել, թե Վանեցյանը ձերբակալվել է Մոսկվայի կենտրոնում։

Exoil Group-ի սեփականատեր Վանեցյանը հայտնել է, որ ազատության մեջ է։

«Ես ազատության մեջ եմ, ինձ մոտ ամեն ինչ լավ է, գրասենյակն աշխատում է, ամեն ինչ բնականոն ռեժիմով է», - ասել է նա։

Գործարար Կարեն Վանեցյանի փաստաբանական խումբը ևս հայտարարություն է տարածել՝ նշելով, որ տարածվող լուրերը, թե Կարեն Վանեցյանն անազատության մեջ է, չեն համապատասխանում իրականությանը։

Նշվում է, որ Վանեցյանի նկատմամբ հանրային քրեական հետապնդում հարուցելու մասին դատախազի 2023 թվականի նոյեմբերի 1-ի որոշմամբ մեղադրանքը վերաբերում է փողերի լվացմանը, սակայն դա ընդամենը դատախազության և քննչական մարմնի ունեցած վարկածն է։

«Կարեն Վանեցյանին վերագրվում են գործողություններ, որոնց հետ կամ ինքն առհասարակ առնչություն չունի ոչ տեսականորեն և ոչ էլ գործնական իմաստով, կամ ընդհանուր բնույթի գործողություններ են, որոնց առնչությունը քրեական օրենսգրքին կրկին բացակայում է։

Վանեցյանի նկատմամբ կալանքը որպես խափանման միջոց կիրառելու ակնհայտ անհիմն, ընթացակարգային և նյութական բազմաթիվ խախտումներով «որոշումը» բողոքարկվել է Վճռաբեկ դատարան, հետևաբար օրինական ուժի մեջ չի մտել»,–ասվում է հայտարարության մեջ։

Ավելի վաղ ՌԲԿ–ի՝ ՆԳՆ–ին մոտ աղբյուրները, հայտնել էին Վանեցյանի ձերբակալման մասին։ Նշվում էր, որ գործարարի հանդեպ հետախուզում է հայտարարված ՀՀ–ում «Զանգեզուրի պղնձամոլիբդենային կոմբինատի» բաժնետմոսերի ձեռքբերման շրջանակում փողերի լվացման գործով։