Բլինքենն Ալիևին կոչ է արել շարունակել բանակցել ՀՀ-ի հետ և ազատել անարդարացի ձերբակալվածներին

PanARMENIAN.Net - ԱՄՆ պետքարտուղար Էնթոնի Բլինքենն Ադրբեջանի նախագահ Իլհամ Ալիևի հետ ապրիլի 28–ի հեռախոսազրույցում հորդորել է նրան շարունակել ՀՀ-ի հետ բանակցությունները և ազատել անարդարացի ձերբակալվածներին։ Այդ մասին ասվում է ԱՄՆ պետքարտուղարության հաղորդագրության մեջ։

Նա հավելել է, որ ԱՄՆ–ն պատրաստ է աջակցել այդ բանակցություններին։

Հաղորդագրության մեջ նշվում է, որ Բլինքենը ողջունել է Ալիևի հայտարարությունն այն մասին, որ Ադրբեջանն ու Հայաստանը պայմանավորվել են ընդունել 1991թ. Ալմաթիի հռչակագիրը որպես սահմանազատման հիմք, և կարևորել է այն երկու կողմերի համար՝ կայուն և արժանապատիվ խաղաղության հասնելու համար։

Բլինքենը ողջունել է ընդդիմադիր գործիչ Գուբադ Իբադօղլուի կալանքը տնային կալանքով փոխարինումը և նրան կալանքի բոլոր ձևերից շուտափույթ ազատ արձակելու կոչ արել։ Բլինքենը կրկին հորդորել է Ադրբեջանին հավատարիմ մնալ մարդու իրավունքների պաշտպանության միջազգային պարտավորություններին և ազատ արձակել երկրում անարդարացիորեն ձերբակալվածներին։

Ըստ Ադրբեջանի նախագահի մամուլի ծառայության Ալիևը հեռախոսազրույցում ասել է, որ ՀՀ հետ ձեռք բերված սահմանազատման պայմանավորվածությունը երկկողմանի հիմունքներով վարվող բանակցությունների արդյունք է երկխոսության և փոխըմբռնման պայմաններում։ Նա ընդգծել է, որ դրական է գնահատում սահմանազատման գործընթացից հետո երկու երկրների սահմանին դեմարկացիայի՝ սահմանագծման աշխատանքների մեկնարկը, գրում է Haqqin.az-ը։

Ալիևն ասել է, որ ղազախական կողմի առաջարկով առաջիկայում Ալմաթիում կհանդիպեն Ադրբեջանի և Հայաստանի ԱԳ նախարարները խաղաղության պայմանագրի շուրջ բանակցությունները շարունակելու նպատակով։ Նա նաև նշել է, որ Ադրբեջանը դեմ է «բաժանարար գծերին Հարավային Կովկասում»։

Ալիևը նաև ասել է, թե «Ադրբեջանը հավատարիմ է իր պարտավորություններին մարդու իրավունքների ոլորտում և որ Ադրբեջանում շարունակվում են ժողովրդավարական բարեփոխումները»։

Նույն օրը՝ ապրիլի 28–ին, Բլինքենը հեռախոսազրույց է ունեցել ՀՀ վարչապետ Նիկոլ Փաշինյանի հետ։ Վարչապետը դրական է արտահայտվել Հայաստան-Ադրբեջան պետական սահմանի սահմանազատման գործընթացի վերաբերյալ՝ ընդգծելով, որ Տավուշի մարզի Ոսկեպար, Կիրանց և Բերքաբեր գյուղերի բնակիչների մտահոգությունները հասկանալի են, և ամեն ինչ կարվի նրանց լեգիտիմ մտահոգությունները հասցեագրելու համար: