ԵԱԶԲ. ՀՀ պետպարտքի ներկայիս ծավալը վտանգ չի ներկայացնում տնտեսության համար

PanARMENIAN.Net - Հայաստանի պետական պարտքի ընթացիկ ծավալը վտանգ չի ներկայացնում տնտեսության համար։ Այս հայտարարությունն արել է ԵԱԶԲ երկրների վերլուծության կենտրոնի ղեկավար Մարինա Սոբոլևսկայան` ներկայացնելով բանկի` 2025-2027 թվականների մակրոտնտեսական կանխատեսումները։

Փորձագետի խոսքով` թեման զգայուն է, սակայն մտահոգության լուրջ նախադրյալներ չկան, գրում է Sputnik Արմենիան։

«Հայաստանի պետական պարտքի ծավալը զարգացող երկրների շրջանում միջինից ցածր մակարդակում է։ Կայուն տնտեսական աճը և ներքին պահանջարկի ավելացումը բյուջեի լրացուցիչ եկամուտներ են ձևավորում` թույլ տալով արդյունավետ կառավարել պարտքի բեռը»,- նշել է Սոբոլևսկայան։

Նա նաև ընդգծել է, որ բյուջետային ծախսերի ավելացումը, այդ թվում` փոխառվող միջոցների հաշվին, կփոխհատուցվի ներդրումային ներուժի աճով և տնտեսական բազայի ընդլայնմամբ:

ԵԱԶԲ վարչության նախագահի տեղակալ և գլխավոր տնտեսագետ Եվգենի Վինոկուրովը հավելել է, որ պետական պարտքը վերլուծելիս կարևոր է հաշվի առնել ոչ միայն դրա բացարձակ ծավալը, այլև սպասարկման արժեքը:

«Հայաստանի համար պարտքի սպասարկման արժեքը շարունակում է ցածր մնալ։ Պարտքի մեծ մասը բաժին է ընկնում սուվերեն վարկերին, որոնք տրամադրվում են ցածր տոկոսադրույքներով: Բացի այդ, Հայաստանի կողմից առևտրային պայմաններով թողարկված եվրապարտատոմսերը խիստ շահավետ պայմաններով են ներգրավվել»,-ընդգծել է Վինոկուրովը։

ԵԱԶԲ-ի կանխատեսման համաձայն` Հայաստանի պետական պարտքի ծավալը 2024 թվականի վերջի 5,037 տրլն դրամից 2025 թվականի վերջին կհասնի 5,914 տրլն դրամի (մոտ 13,972 մլրդ դոլար՝ ֆինանսների նախարարության հաշվարկային փոխարժեքով)։ ՀՆԱ-ի նկատմամբ պետական պարտքի հարաբերակցությունը 49.8%-ից կաճի մինչև 53.5%: Պարտքի սպասարկման ծախսերը, ներառյալ վարկերի և պարտատոմսերի վճարումները, կկազմեն 394.1 մլրդ դրամ (մոտ 1,015 մլրդ դոլար):