Բաքվի դատարանը մերժել է Արցախի նախկին ղեկավարների խափանման միջոցի փոփոխության միջնորդությունը

PanARMENIAN.Net - Հունվարի 21–ին Բաքվի զինդատարանում շարունակվել է Արցախի նախկին ղեկավարների շինծու դատավարության նախապատրաստական նիստը, որը վարում է դատավոր Զեյնալ Աղաևը։

Ըստ ադրբեջանական լրատվամիջոցների, մեղադրյալներին ապահովել են հայերենի թարգմանիչներով, ինչպես նաև դատապաշտպաններով։

Ընդմիջումից հետո փաստաբանների մեծ մասը միջնորդություն է ներկայացրել կալանքը տնային կալանքով փոխարինելու մասին, ինչը մերժվել է, հայտնում է Minval.az-ը։

Մեղադրանքը ներկայացնում է 6 դատախազ, գրում է APA-ն։

Դատականի նիստում ելույթ են ունեցել այսպես կոչված վկաներից մի քանիսը։

Արցախի նախկին պետնախարար Ռուբեն Վարդանյանի գործով նախնական նիստը կշարունակվի հունվարի 27-ին։ Վարդանյանը, ով նախկինում Ռուսաստանի քաղաքացի էր, մեղադրվում է մի շարք հոդվածներով, այդ թվում՝ «ահաբեկչության, դրա ֆինանսավորման և Ադրբեջանի սահմանը ապօրինի հատելու համար»։

2023 թ․ սեպտեմբերին, Արցախում իննամսյա շրջափակումից և ամբողջ հայ բնակչության էթնիկ զտումից հետո, Ադրբեջանը գերեվարել է Արցախի նախկին նախագահներ Արկադի Ղուկասյանին, Բակո Սահակյանին, Արայիկ Հարությունյանին, ինչպես նաև նախկին պետնախարար Ռուբեն Վարդանյանին, արտգործնախարար Դավիթ Բաբայանին և մի շարք այլ նախկին ղեկավարների։ Նրանց ներկայացված կեղծ մեղադրանքները կարող են հանգեցնել նույնիսկ ցմահ ազատազրկման։ Հունվարի 17-ին Բաքվում կայացել է Արցախի ղեկավարների գործով դատավարության առաջին նիստը։

Ռուբեն Վարդանյանը հունվարի 16-ին իր ուղերձում նշել է, որ ձերբակալման օրվանից ոչ մի ցուցմունք չի տվել, բացի իր անուն-ազգանունից։ Նա ընդգծել է, որ իր ստորագրությամբ կազմված բոլոր արձանագրությունները կեղծ են և հաստատել է, որ իրեն, իր փաստաբանին ու թարգմանչին ենթարկել են ճնշումների։