Փաշինյան. 2018-ից ի վեր Հայաստանում ստեղծվել է 203, 000 հազար աշխատատեղ

27 փետրվարի 2025 - 13:46 AMT

PanARMENIAN.Net - Փոխվարչապետ Մհեր Գրիգորյանը կառավարության նիստում ներկայացրել է կառավարության ծրագրի (2021-2026 թթ.) 2024 թվականի կատարման ընթացքի և արդյունքների զեկույցը։

«Զեկույցը ներառում է կառավարության ծրագրի կատարման վերաբերյալ արդյունքային և թվային ցուցանիշներ, ինչպես նաև 2024 թվականի սոցիալ-տնտեսական և միջազգային կազմակերպությունների ներկայացրած վիճակագրությունը»,- հավելել է նա, հայտնում է Panorama.am-ը։

Վարչապետ Նիկոլ Փաշինյանը հայտարարել է, որ 2018-ից ի վեր Հայաստանում ստեղծվել է ավելի քան 203,000 աշխատատեղ։

«Որպես բացարձակ թիվ և տոկոսային աճ սա շատ էական է»,-ասել է նա։

Նա հավելել է, որ 2025 թվականի հունվարին նախորդ տարվա հունվարի համեմատ 41 հազարով ավելի աշխատատեղ կա։

Նա նաև նշել է, որ 2018-ից ի վեր միջին աշխատավարձը 40%-ով ավելի է աճել, քան գնաճը։

Սակայն վարչապետը շրջանցել է աղքատության ցուցանիշների թեման։ Մասնավորապես, 2018-ի համեմատ աղքատության մակարդակը նվազել է ընդամենը 2-3%-ով, այն էլ՝ աղքատության գնահատման նոր մեթոդաբանության կիրառման արդյունքում։ Այդուհանդերձ, պարզ չէ, թե ինչու աշխատավարձերի էական աճը չի նպաստել քաղաքացիների բարեկեցության զգալի բարելավմանը և աղքատության նվազմանը։

2018–ից հետո աղքատության մակարդակը 26%-ից բարձրացել է մինչև 28%, որից հետո որոշ չափով նվազել է՝ ուկրաինական պատերազմի հետևանքով ձևավորված տնտեսական իրավիճակի շնորհիվ։

Փաշինյանն առավել մանրամասն անդրադարձել է միջին աշխատավարձի բարձրացմանը, սակայն խուսափել է ընդգծել, որ այն հիմնականում ապահովվել է ՏՏ և բանկային ոլորտներում աշխատավարձերի աճի հաշվին։ Միևնույն ժամանակ, միջին և ցածր եկամուտ ունեցող բնակչության մոտ 60%-ի աշխատավարձը էականորեն չի ավելացել, ինչն էլ նպաստել է աղքատության բարձր մակարդակի պահպանմանը։