Ըստ Հաջիևի՝ ՀՀ–ն սխալվում է, եթե կարծում է, որ բանաձևերը կարող են ազդել Ադրբեջանի վրա

PanARMENIAN.Net - Ադրբեջանի նախագահի օգնական Հիքմեթ Հաջիևը հայտարարել է, թե Երևանը սխալվում է, եթե կարծում է, որ կարող է բանաձևերի միջոցով ազդել Ադրբեջանի որոշումների վրա։

Եվրախորհրդարանը բանաձև է ընդունել, որով պահանջում է Ադրբեջանից անհապաղ ազատ արձակել հայ ռազմագերիներին և այլ կալանավորված անձանց։

«Հայաստանը և նրա հովանավորները սխալվում են»,–ասել է նա, հայտնում է Minval.az-ը։

Հաջիևը նաև հայտարարել է, թե Հայաստանի տարածքում կան անձինք, ովքեր «պետք է քրեական պատասխանատվության ենթարկվեն»։

Հաջիևը նաև ընդգծել է, որ քննարկումների առանցքում է գտնվում փոխհատուցման հարցը։

«Ադրբեջանի նախագահի հանձնարարությամբ համապատասխան կառույցները ժամանակակից մեթոդների կիրառմամբ մանրամասն գնահատել են Հայաստանի 30-ամյա օկուպացիայի հետևանքով մեր քաղաքների ու գյուղերի ավերածությունները, ինչպես նաև մեր մշակութային ու նյութական ժառանգության ոչնչացումն ու թալանը։ Այս հարցը շարունակում է մնալ կարևոր թեմա՝ տարածաշրջանում լիարժեք խաղաղություն ապահովելու համար»,–ասել է Հաջիևը։

Նա փաստացի նոր պահանջներ է ներկայացրել Հայաստանին՝ խաղաղության պայմանագրի շուրջ բանակցություններն ավարտելու վերաբերյալ ՀՀ և Ադրբեջանի ԱԳՆ–ների հայտարարության ֆոնին։

ՀՀ ԱԳՆ–ն հայտարարել է, որ ընդունել է չհամաձայնեցված 2 հոդվածի վերաբերյալ ադրբեջանական կողմի առաջարկները և որ Խաղաղության համաձայնագիրը պատրաստ է ստորագրման: Նշվում է, որ ՀՀ–ն պատրաստ է խորհրդակցություններ սկսել համաձայնագրի ստորագրման ժամկետների և տեղի շուրջ։

Խաղաղության համաձայնագրի նախագիծը բաղկացած է 17 կետից, որոնցից նախկինում համաձայնեցվել էր 15-ը։ Չհամաձայնեցված կետերից մեկը միմյանց նկատմամբ միջազգային մակարդակով պահանջներից հրաժարվելն էր, իսկ մյուսը՝ այլ երկրների ներկայացուցիչներին Ադրբեջանի և Հայաստանի սահմանին չտեղակայելը։