ՌՀՄ Կրասնոդարի բաժանմունքը պատրաստ է աջակցել ընտրողներին՝ մեկնելու ՀՀ

PanARMENIAN.Net - Ռուսաստանի հայերի միության Կրասնոդարի տարածաշրջանային բաժանմունքը տեղեկացրել է արտերկրում բնակվող ՀՀ քաղաքացիների ընտրական մասնակցության ընթացակարգի և ընտրություններին մասնակցելու նպատակով ՀՀ մեկնելու հարցում աջակցելու պատրաստակամության մասին: Այդ մասին ասվում է ՌՀՄ ֆեյսբուքյան էջում, ինչպես նաև այլ սոցցանցերում հրապարակված հայտարարության մեջ:

Գրառումը հրապարակվել է մայիսի 15-ին, գրում է Factor.am-ը:

Հրապարակումներում ներկայացվում է, թե ինչ կարգով կարող են արտերկրում բնակվող ՀՀ քաղաքացիները մասնակցել հունիսի 7-ին Հայաստանում անցկացվելիք խորհրդարանական ընտրություններին։

Նշվում է, որ հրապարակման մեջ ներկայացվել են Ռուսաստանի հայերի միության Կրասնոդարի տարածաշրջանային բաժանմունքի հասցեն և բաժանմունքի փոխնախագահ Գևորգ Սահակյանի հեռախոսահամարը, որով կապվել չի հաջողվել՝ զանգերին արձագանք չի եղել։

Ռուսաստանի հայերի միության Կրասնոդարի երկրամասի բաժանմունքը Ռուսաստանի հայերի միության տարածաշրջանային կառույցն է, որը, ըստ կազմակերպության կայքի, զբաղվում է տեղի հայկական համայնքի համախմբման, մշակութային, սոցիալական և հայրենակցական ծրագրերով։

Մայիսի 8-ին մեկնարկած նախընտրական քարոզարշավը կշարունակվի մինչև հունիսի 5-ը։ Հունիսի 6-ը կլինի լռության օր, իսկ հունիսի 7-ին կանցկացվեն ընտրությունները։ Մայիսի 25-ին հայտնի է դարձել, որ «Ալյանս» առաջադիմական ցենտրիստական կուսակցությունը ներկայացրել է ինքնաբացարկի դիմում, որի հիամն վրա ԿԸՀ-ն ուժը կորցրած է ճանաչել կուսակցության ընտրացուցակի գրանցումը։ Առաջիկա ընտրություններում 13 համարի քվեաթերթիկ չի լինելու։