Հայաստանի կառավարությունը մտադիր է խթանել խաղատների գործունեությունը երկրի հեռավոր մարզերում

PanARMENIAN.Net -
Ըստ ՀՀ կառավարության նախաձեռնության «Շահույթով խաղերի եւ խաղատների մասին» ՀՀ օրենքում փոփոխություններ կատարելու մասին օրինագծի շրջանակներում խաղատներից գանձվող պետական տուրքը կկազմի 400 մլն դրամ, իսկ խաղասրահներից կգանձվի 50 մլն դրամ: Այդ մասին լրագրողներին է հաղորդել ՀՀ ԱԺ տնտեսական հարցերով մշտական հանձնաժողովի նախագահ, պատգամավոր Վարդան Այվազյանը:



Նա նշել է, որ օրինագծով հստակեցված են այն գոտիները, որտեղ տուրքերը Երեւանի մերձակայքում եւ հեռավոր շրջաններում գտնվող խաղատներից կտրուկ կտարբերվի: «Մեր կողմից օրինագիծը քննարկման կներկայացվի ԱԺ-ում, ըստ որի հեռավոր մարզերում խաղատներին արտոնություններ կտրվեն»,-ասել է նա:



Այս համատեքստում Այվազյանը նշել է, որ սահմանամերձ գոտիներում եւ հեռավոր մարզերում խաղատուն բացելու դեպքում, պետտուրքեր չեն գանձվի:



Պատգամավորը նշել է, որ Հայաստանում օրենք կա, որի համաձայն, ըստ միջազգային պայմանագրի, ազատ տնտեսական գոտիներում պետությունը կարող է նման գործունեություն ծավալել, մասնավորապես, դա կարելի է անել «Զվարթնոց» օդանավակայանի տարածքում: Երկրորդն, ըստ նրա, օրենքով նախատեսվում է նաեւ թույլ տալ խաղատների գործունեությունը Երեւանի մերձակա շրջաններում, բացառությամբ Երեւան քաղաքի, նրանց համար, ով 40 մլրդ դրամի ներդրում կանի: «Այն խաղատները, որոնք կշարունակեն գործունեությունն Երեւանի մերձակայքում, պետք է 5 անգամ ավելի մեծ տուրքեր վճարեն»,-ասել է նա:



Ըստ ԱԺ տնտեսական հարցերի մշտական հանձնաժողովի նախագահի, խաղատների սեփականատերերը չեն համաձայնվի օրինագծին, քանի որ հեռավոր մարզերում շահույթը շատ ավելի քիչ է, քան մայրաքաղաքների արվարձաններում:



Իր հերթին ՀՀ ֆինանսների նախարարի տեղակալ Վարդան Արամյանը նշել է, որ կառավարությունը հստակ որոշել է այն գոտիները, ուր 2013թ-ից պետք է տեղափոխվեն խաղատները: «Դա բխում է միջազգային փորձից` խաղատները բացվում են այնտեղ, որտեղ զարգացած է զբոսաշրջությունը, մասնավորապես, Սեւանում, Ջերմուկում, Ծաղկաձորում: Այս համատեքստում փոխնախարարն ասել է, որ ՀՀ կառավարության քաղաքականությունն ուղղված է երկու հարցի լուծմանը` ապահովել մարզերի հավասար զարգացումը, եւ, փողերի լվացման տեսակետից, նոր մեխանիզմներ ներդնել խաղատների գործունեության արդյունավետ վերահսկողության համար:



ԱԺ տնտեսական հարցերի մշտական հանձնաժողովը 2010թ. հունվարի 19-ին քննարկել է «Շահույթով խաղերի եւ խաղատների մասին« ՀՀ օրենքում նախատեսվող փոփոխությունների օրինագծերի փաթեթը: Այդ օրինագծով որոշովում է 2013թ. հունվարի 1-ից դուրս տանել խաղատներն ու խաղասրահները քաղաքային համայքների վարչական տարածքներից, զբոսաշրջային վայրեր: