Լոնդոնը հուսով է, որ Հայաստանի ու Ադրբեջանի նախագահների հանդիպումները մշտական կդառնան

PanARMENIAN.Net - Լոնդոնը ողջունում է հայ-ադրբեջանական բարձր մակարդակի երկխոսությունը: Այդ մասին երեկ Բաքվում կայացած մամլո ասուլիսում հայտարարել է Մեծ Բրիտանիայի ԱԳ նախարար Ուիլյամ Հեյգը, որն այդ երկրում է գտնվում մեկօրյա աշխատանքային այցով:

«Մենք ողջունում ենք Ադրբեջանի ու Հայաստանի նախագահների հանդիպումը և հուսով ենք, որ հանդիպումները մշտական բնույթ կստանան»,-ասել է նախարարը, հայտնում է «Թրենդը»:

Նոյեմբերի 19-ին Վիեննայում տեղի ունեցավ վերջին երկու տարում Հայաստանի և Ադրբեջանի նախագահների առաջին հանդիպումը, առանձնազրույցը: Ավելի ուշ նախագահներին միացան ԵԱՀԿ Մինսկի խմբի համանախագահներ Իգոր Պոպովը, Ժակ Ֆորը և Ջեյմս Ուորլիքը ու ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկը: Հանդիպումից հետո ԵԱՀԿ Մինսկի խմբի համանախագահները հանդես եկան հայտարարությամբ, որտեղ նշեցին, որ առանձնազրույցի և դրան հաջորդած համանախագահների ու նախարարների մասնակցությամբ աշխատանքային հանդիպման ժամանակ նախագահները քննարկել են հակամարտության կարգավորմանն առնչվող հարցերի լայն շրջանակ:

Նախագահները պայմանավորվել են հանդիպել առաջիկա ամիսներին: Ըստ միջնորդների հայտարարության, նախագահները համաձայնվել են խթանել բանակցությունների ընթացքը, ուղղված խաղաղ կարգավորմանը և համանախագահների հետ միասին շարունակել աշխատանքն արդեն արվածի հիման վրա: