// IP Marketing video - START// IP Marketing video - END

Մերկելի գրասենյակն՝ Անկարային. Պետք է հարգեք Բունդեսթագի որոշումը

Մերկելի գրասենյակն՝ Անկարային. Պետք է հարգեք Բունդեսթագի որոշումը

PanARMENIAN.Net - Գերմանիայի կանցլեր Անգելա Մերկելի գրասենյակը պատասխանել է Թուրքիայի նախագահ Ռեջեփ Թայիփ Էրդողանի՝ Բունդեսթագի կողմից Հայոց ցեղասպանության ճանաչմանը հետևած հայտարարարություններին:

Մերկելի մամուլի խոսնակ Շթեֆան Սեյբերթը հայտարարել է, որ Բունդեսթագի որոշումը սահմանադրական կարգով ընտրված, անկախ մարմնի որոշում է:

«Բունդեսթագն անկախ որոշում է կատարել, և պետք է հարգել այն», - ասել է նա, հավելելով, որ նույն միտքը Մերկելը փոխանցել է Թուրքիայի նախագահին:

Թուրք մի շարք պաշտոնյաներ աղմկահարույց հայտարարություններ արեցին Բունդեսթագի կողմից Հայոց ցեղասպանության ճանաչումից հետո: Ինքը Էրդողանը մեղադրել է գերմանացիներին 20-րդ դարի սկզբում նամիբիացիների ցեղասպանության համար, իսկ Թուրքիայի արդարադատության նախարարը հայտարարել է, որ հրեաներին ողջակիզած երկիրը թուրքերին նկատողություն անելու իրավունք չունի: Դրան հետևեց Հրեական համայնքների դաշնության նախագահի պատասխանն առ այն, որ Գերմանիան, ի տարբերություն Թուրքիայի, սեփական պատմությունը չի հերքում:

Հունիսի 2-ին Գերմանական խորհրդարանը ձայների ճնշող մեծամասնությամբ կողմ է քվեարկել հայերի ու այլ քրիստոնյաների ցեղասպանությունը ճանաչող բանաձևին: Դեմ էր ընդամենը 1 պատգամավոր, ևս մեկը ձեռնպահ է մնացել:Բանաձևում ասվում է՝ «101 տարի առաջ հայերի և այլ քրիստոնյա փոքրամասնությունների դեմ իրականացված ցեղասպանությունը պետք է հիշատակել»։ Նշվում է, որ խորհրդարանը դատապարտում է Օսմանյան կառավարության կողմից հայերին գրեթե ամբողջությամբ ոչնչացնելու գործողությունները։ 5 էջանոց բանաձևում նշվում է, որ «Հայերի ճակատագիրը 20-րդ դարում տեղի ունեցած կոտորածի, էթնիկ զտման, տեղահանության ու ցեղասպանության օրինակ է»։

Կարդացեք նաև. Թուրք ազգայնականները սպառնում են սպանել Բունդեսթագում ցեղասպանության բանաձևը նախաձեռնողին

 Ուշագրավ
Վրաստանի վարչապետը կայցելի նաև Ծիծեռնակաբերդի հուհաշահամալիր՝ հարգանքի տուրք մատուցելու Հայոց ցեղասպանության զոհերի հիշատակին
ԱԳՆ-ում նշում են՝ ռազմական ներխուժումը ստեղծում է նաև ինքնության հիմքով մարդու իրավունքների ծանր և զանգվածային խախտումների անմիջական վտանգ
Թուրքական զորքերը Սիրիայի հյուսիսում ռազմական գործողություններ են սկսել
Երկաթուղու շարժակազմը ռուսական կողմի սեփականությունն է