Սերժ Թանկյանն ու ընկերները խնդրագիր են տարածել Հայաստանի անկախության առթիվ

Սերժ Թանկյանն ու ընկերները խնդրագիր են տարածել Հայաստանի անկախության առթիվ

PanARMENIAN.Net - Ամերիկահայ հայտնի երաժիշտ Սերժ Թանկյանը ՀՀ անկախության 25 ամյակի առթիվ ընկերների՝ Ատոմ Էգոյանի, Վահե Բերբերյանի, Հրանտ Թոխատյանի, Էրիկ Նազարյանի, Կառլա Կարապետյանի և այլ հայտնիների հետ խնդրագիր է տարածել Change.org կայքում:

«Ընկերներ (Հայաստանում և աշխարհում), այսօր Հայաստանի անկախության 25-ամյակն է: Մենք պետք է օգտվենք այս հնարավորությունից՝ նշելու այս փոքր, բայց հիասքանչ ժողովրդի որոշ հաջողությունները՝ միևնույն ժամանակ պայքարելով մտահոգող խնդիրների դեմ: Անկախությունը քիչ բան է նշանակում, երբ հասարակության ստվար հատվածը դժգոհ է: Այդ պատճառով ես և իմ ընկերները հայտարարություն ենք պատրաստել` հանուն Հայաստանի ժողովրդի և դրական քաղաքացիական փոփոխությունների ու բարեփոխումների աջակցության»,- գրել է Թանկյանն իր ֆեյսբուքյան էջում և կոչ արել ստորագրել խնդրագիրը Change.org կայքում:

Հայտարարության տեքստում, մասնավորապես, ասվում է.

«Արդարադատություն Հայաստանում

Մենք, որպես Հայաստանում և Սփյուռքում բնակվող հայեր, հավատարիմ ենք Հայաստանում անհապաղ փոփոխության և արդարության գործին:

Նկատի ունենալով 2016 գարնանը և ամռանը տեղի ունեցած ցնցումներն ու բողոքի ակցիաները, որոնք հանգեցրին մարդու և քաղաքացիական իրավունքների կոպիտ խախտումների,

Մենք ասում ենք ՈՉ՛

համակարգված կոռուպցիային, մոնոպոլիաներին, դատական անհավասարությանը, ոստիկանության դաժանությանը, քաղաքական կողմնակալությանը, անհավասար իրավունքներին, արտագաղթին և ընտրակեղծիքներին, որոնք նպաստել են շարունակական անկարգություններին։

Մենք ասում ենք Այո՛

բոլոր մարդկանց հավասարությանը, մարդու իրավունքների հիմնարար պահպանմանը և պաշտպանությանը, արդար և թափանցիկ ընտրություններին ուղղակի ներգրավվածությանը, օրենքի գերակայության նկատմամբ հարգանքին, արդար աշխատավարձերին, իշխանության հավասարազոր տարանջատմանը, ազատ մամուլին և թշվառների պաշտպանությանը։

Մենք ասում ենք Այո՛

շոշափելի, ժողովրդավարական փոփոխություններին՝ Հայաստանի քաղաքացիների հետ քաղաքացիական ներգրավվածության միջոցով:

Որպես հայերի համաշխարհային համայնք՝ մենք կցանկանայինք, որ Հայաստանի քաղաքական առաջնորդները մարմնավորեն սկզբունքայնություն, հաշվետվություն, իմաստություն, խելամտություն, դիվանագիտություն, կարեկցանք, արդյունավետություն և տեսլական մտածողություն Հայաստանի ժողովրդի հրատապ և ակնկալվող կարիքները հոգալու համար և, այդպիսով, ապահովել հավասար, արդար և կառուցողական ուղի դեպի իրական ժողովրդավարություն, որտեղ յուրաքանչյուր ձայն կարևոր է:

«Արդարադատություն Հայաստանում»-ը մտահոգ հայերի համաշխարհային կոալիցիա է, որոնք հավատում են Հայաստանի ժողովրդի հետ համերաշխությանը և նրան, որ անհրաժեշտ է ներկա լինելով հանդես գալ որպես ականատես և դիտորդ ազատ ու արդար ընտրությունների, միևնույն ժամանակ ակտիվորեն ներգրավելով Հայաստանի բնակչությանը՝ այսպիսով նպաստելով մեր ժողովրդի ներկային և ապագային։ Մենք պետք է պատկերացնենք մի իրավահավասար պետություն, որն արժանի է մեր ժողովրդի տոկունությանը, և հասնել այդ նպատակին: Հաշվի առնելով մեր բացառիկ արժեքները և բնավորությունը՝ Հայաստանը կարող է և պետք է դառնա հնարավորությունների, ստեղծարարության, ժողովրդավարության և հույսի երկիր մի տարածաշրջանում, որը հղի է քաոսով։ Այլընտրանքն անհավատալի է»:

 Ուշագրավ
Նա նաև ասել է, որ տարածաշրջանային անվտանգությունը պետք է ապահովեն տարածաշրջանի երկրները
Նա հավելել է, որ թուրքական կողմն ավարտել է Նախիջևանի և Կարսի միջև 224 կմ երկարությամբ երկաթուղային գծի կառուցումը
Փետրվարի 1–ից ՀՀ–ն պաշտոնապես միացել է Հաագայի Միջազգային քրեական դատարանին
Փետրվարի 1-ին Միջազգային քրեական դատարանը իրավասություն է ստանալու հետաքննել Ալիևի գործողությունները
---