RIP, iPod (2001-2022)

RIP, iPod (2001-2022)

2000-ականների ևս մեկ icon պատմության գիրկն անցավ

Եթե տանը 2000-ականների iPod ունեք, բայց չեք օգտագործում և վաղուց մոռացել եք դրա գոյության մասին, ապա ճիշտ ժամանակն է մաքրել փոշին ու մտածել կա՛մ վաճառելու, կա՛մ էլ ապահով տեղում պահելու մասին։

PanARMENIAN.Net - 22 տարի անց Apple-ը դադարեցնում է լեգենդար iPod-ների արտադրությունը և այս ֆոնին eBay-ում «ռետրո» iPod-ները սկսել են վաճառել մի քանի հազար դոլարով։

2001-ին Սթիվ Ջոբսն առաջին iPod-ը ներկայացրեց ամենապարզ ու գրավիչ բանաձևով. 1000 երգ՝ ձեր գրպանում։ Այսօր Apple Music-ի միջոցով մեզ հասանելի է 90 միլիոն երգ, բայց հիմքում հենց iPod-ի հեղափոխական գաղափարներն են։

21-րդ դարի սկիզբը միանգամից ազդարարեց տեխնոլոգիական հեղափոխության ամենաակտիվ փուլը ու զարմանալի չէ, որ Apple-ն այս ճանապարհի առաջամարտիկներից էր։ Երաժշտությունը CD-ներով և «կասետներով» լսող սերնդի համար iPod-ի գաղափարն անհասկանալի էր ու գուցե նաև բարդ էր ընկալել, թե ինչպես մեկ բռաչափ սարքի մեջ կարող է տեղավորվել այնքան երգ, որքան իրենք գուցե այդպես էլ չլսեն։ iPod-ը ներկայացնելու ընթացքում Սթիվ Ջոբսը կարծես կանխագուշակել էր, թե ինչպես է այս գաջեթը փոխելու մարդկանց պատկերացումները ու հայտարարել էր, որ երաժշտություն լսելու մշակույթն այլևս երբեք նույնը չի լինի։ ՈՒ հենց այսպես, նախ զարմանքով, հետո հիացմունքով, քայլ առ քայլ ստեղծվեց երաժշտությունը լսելու և տարածելու լրիվ նոր մշակույթ։ Այսօր iPod-ի բոլոր հնարավորություններն ինտեգրված են Apple-ի մյուս բոլոր արտադրանքներում՝ iPhone-ից և Apple Watch-ից մինչև iPad և Mac, բայց կնքահայրը հենց iPod-ն էր։

iPod-ն առաջին թվային փլեյերը չէր, բայց ամենահաջողվածն էր թե՛ վաճառքների, թե՛ դիզայնի տեսանկյունից։ Apple-ին հատուկ պարզ ինտերֆեյսը, տեղաշարժվող մենյուն, երգերի դասակարգման համակարգը միանգամից գրավել էին երաժշտասերներին։ Սա առաջին հերթին կարելի է փաստել թվերով։ Դեռ 2009-ին iPod-ը համարվում էր պատմության մեջ ամենաշատը վաճառված թվային ձայնային փլեյերը։ Թողարկումից մեկ տարի անց՝ 2002-ին վաճառվել է 400,000 հատ iPod, 2006-ին՝ 39 միլիոն, իսկ 2007-ին 51 միլիոն։ Երկու տասնամյակում Apple-ը վաճառել է 400 միլիոն հատ iPod։

iPod-ը նաև յուրատեսակ այցեքարտ դարձավ իր պատմության ամենադժվար տարիները հաղթահարող Apple-ի համար։ Սա այն արտադրանքն էր, որ տարածվեց աննախադեպ մեծ արագությամբ ու ալիքը հասավ այնպիսի մարդկանց, որոնք մինչև այդ ո՛չ Apple-ի մասին գիտեին, ո՛չ էլ պատրաստվում էին գումար ծախսել՝ տանը կամ փողոցում երաժշտություն լսելու համար։ iPod Classic-ը 2001-ին վաճառվում էր 399 դոլարով։ Այսօր թվիթերի օգտատերերը հիշում ու պատմում են, թե ինչպես էին «նեղ օրվա համար» հավաքած հոգեպահուստով iPod գնում։ Կարելի է ասել, որ գրեթե նույն վիճակն էր, ինչ Հայաստանում վարկով iPhone գնելու պրակտիկան։

Ի դեպ՝ iPhone-ի մասին։ Հաճախ կլսեք, որ հենց iPod-ն էր iPhone-ի նախատիպը։ Իրականում սա ոչ միայն ու ոչ այնքան հաճախորդների կարծիքն է, այլև հենց Apple-ի ու անձամբ Սթիվ Ջոբսի կողմից առաջ բերված թեզ է։ iPod Touch-ը նախագծել է նույն թիմը, որը հետագայում ստեղծել է iPhone-ը։ Առաջին բնորոշումը, որ Սթիվ Ջոբսը տվել է սմարթֆոնին, հետևյալն էր՝ «iPhone-ը լայնէկրան iPod-ն է՝ սենսորային կառավարմամբ»։ Իրականում iPhone-ի ստեղծումը iPod-ների վերջի սկիզբն էր։ Սմարթփոնի աննախադեպ հաջողությունը ստվերեց iPod-ների փառքն ու մղեց երկրորդ պլան։ iPhone-ի վաճառքների աճին զուգահեռ նվազում էր iPod-ների վաճառքը։ Բանը հասավ նրան, որ վերջին տարիներին iPod-ները Apple-ի կայքի «Other/Այլ» բաժնում էին և մարկետինգային ռազմավարությունն էլ առանձնապես ուշադիր չէր 2000-ականների icon-ի նկատմամբ։

Երբ Apple-ը հայտարարեց, որ դադարեցնում է iPod-ների արտադրանքը՝ նոստալգիայի մեջ հայտնված սերունդը արձագանքեց միանգամից։ Եվ ոչ միայն թվիթերում։ Apple-ը հայտնել էր, որ հաճախորդները կկարողանան ձեռք բերել iPod Touch, քանի դեռ պահեստներում դրանց խմբաքանակը չի վերջացել։ Եվ ընդամենը մեկ օրում iPod Touch-ը Միացյալ Նահանգներում sold out է։ Հիմա վաճառքի գայթակղիչ պլաններ ունեն վերավաճառողները։

Նանե Մանուկյան
 Ամենաընթերցվողը բաժնում
WWDC 2022-ին Apple-ի գլխավոր նորույթները
Internet Explorer-ի «մահն» ու դրա հետևանքները
Որոնք էին Summer Game Fest 2022-ի գլխավոր անոնսները
Մեծ ադրոնային կոլայդերում սկսել են ռեկորդային էներգիայով մասնիկների բախումները
 Ուշադրության կենտրոնում
Google-ում, Facebook-ում տեղադրվող գովազդներն ուզում են հարկել

Google-ում, Facebook-ում տեղադրվող գովազդներն ուզում են հարկել Ըստ Քերոբյանի, առնվազն 20 մլրդ դրամ հարկ կհավաքվի

 Բաժնի այլ նյութերը
Նորածին Տիեզերքի առաջին վկաները Ջեյմս Ուեբի աստղադիտարանը Տիեզերքի խորքային ուսումնասիրության ընթացքում խիստ անսովոր օբյեկտներ է գտնում
Համակարգիչների արքան Ամերիկյան սուպերհամակարգիչը հաղթահարել է էքզաֆլոպսային սահմանը` ի՞նչ է դա նշանակում
Հայացք՝ վերևներից «Հայաստանի առաջին արբանյակի» տեխնիկական մանրամասները
---