ՆԱԽԱԳԱՀՆԵՐԸ ԳՈՀ ԵՆ ՎԱՐՇԱՎՅԱՆ ՀԱՆԴԻՊՈՒՄԻՑ

PanARMENIAN.Net - Հայկակական կողմն առավել ժլատ էր վարշավյան հանդիպման մասին տեղեկատվություն տարածելում: Սակայն ադրբեջանական կողմի ներկայացուցիչների խոսքերից կարելի է նկատել, որ որոշակի առաջընթաց նկատվում է: Իլհամ Ալիեւը, որը դեռ վերջերս էր ասում, թե Մինսկի խմբի շրջանակներում ընթացող բանակցությունները փակուղի են մտել, այսօր արդեն պնդում է, որ «հակամարտության լուծման ճանապարհները գտնելու եւ համատեղ առաջ գնալու հնարավորություններ կան»: Իսկ Ադրբեջանի արտաքին գործերի նոր նախարար Էլդար Մամեդյարովն, ըստ էության, հերքեց ան խոսակցությունները, թե Բաքուն ցանկանում է զրոյից սկսել բանակցությունները: Ավելին, նա նշեց, որ «բանակցությունների շարունակման համար որոշակի հիմք է ստեղծվել»: Այսպիսով, կարելի է ենթադրել, որ բանակցությունները կշարունակվեն այն հունով, որով դրանք ընթացել էին մինչ Բաքուն հրաժարվեց «փարիզյան սկզբունքներում» ներառված գաղափարներից:

Ամեն ինչ առվել հստակ կլիներ, եթե հակասություններ չնկատվեին Հայաստանի եւ Ադրբեջանի արտաքին գործերի նախարարների հայտարարություններում: Էլդար Մամեդյարովը պնդում է, որ նախագահները քննարկել են «Պրահայում Մինսկի խմբի համանախագահների ներկայացրած կոնկրետ գաղափարները»: Այդպիսով, նա հաստատել է ռուս միջնորդ Յուրի Մերզլյակովի տեղեկատվությունն այն մասին, որ իսկապես միջնորդները նոր առաջարկներ են ներկայացրել: Դեռեւս երկու շաբաթ նույն Մամեդյարովը հերքել էր համանախագահների նոր նախաձեռնությունների գոյությունը: Վարդան Օսկանյանն այսօր էլ շարունակում է պնդել, որ վարշավյան հանդիպման ժամանակ «կոնկրետ գաղափարներ եւ տարբերակներ չեն քննարկվել»:

Հիշեցնենք, որ փարիզյան հանդիպման ավարտին Մինսկի խմբի ռուս համանախագահը գրեթե սենսացիոն հայտարարություն արեց այն մասին, թե միջնորդները նոր առաջարկներ են ներկայացրել, որոնց քննարկումը լավատեսություն է առաջացրել ոչ միայն խաղաղարարների մոտ, այլեւ` Հայաստանի եւ Ադրբեջանի արտաքին գործերի նախարարների: Մինչ Վարդան Օսկանյանը եւ Էլդար Մամեդյարովն այդ տեղեկատվությունը համերաշխորեն հերքում են, մյուս երկու միջնորդները հաստատակամորեն լռում են: Այդպիսով, եթե մինչ վերջերս հակասություններ կային նախարարաների եւ միջնորդների հայտարարությունների մեջ, ապա այժմ իրար հակասում են հենց հակամարտության կողմերը: Դժվար է հասկանալ այդ հակասության պատճառները: Օրինակ` Բաքվում ենթադրում են, թե հայ նախարարը «ելույթ է ունենում` հաշվի առնելով ներքաքաղաքական իրադրությունը»: Իբրեւ թե, նա չի շտապում նոր առաջարկների գոյության մասին խոսել, քանի որ դեռեւս չգիտե` ինչպես դա կազդի ընդդիմության տրամադրվածության վրա:

Ենթադրվում է, որ ամեն ինչ վերջնականապես կպարզվի Հայաստանի եւ Ադրբեջանի արտաքին գործերի նախարարների հանդիպման ժամանակ, որը տեղի կունենա մայիսի 12-ից 13-ը Ստրասբուրգում` համանախագահների մասնակցությամբ: Այս մասին տեղեկացնելով` Վարդան Օսկանյանը նշեց, որ հանդիպմանը երկու նախարարները կներկայանան նախագահների կողմից տրված հստակ հանձնարարականներով: