Եվրոպացի խորհրդարանականներ. ՀՀ դեմ Ադրբեջանի գործողություններն ահաբեկչություն են

Եվրոպացի խորհրդարանականներ. ՀՀ դեմ Ադրբեջանի գործողություններն ահաբեկչություն են

PanARMENIAN.Net - Եվրախորհրդարանի պատգամավոր, բուլղարացի քաղաքական գործիչ Անգել Ջամբազկին խոսել է Հայաստանի սահմանին ադրբեջանական վերջին ագրեսիայի մասին, գրում է Tert.am-ը:

Խորհրդարանականը, մասնավորապես ասել է. «Ես կարծում եմ` Լեռնային Ղարաբաղի հողը հայերի հողն է: Կատարվածն ահաբեկչական գործողություն է: Եվրոպական տեսանկյունից լրիվ անընդունելի է: Ես ցանկանում եմ, որ եվրոպական կառույցները խիստ մոտեցում ցուցաբերեն` մարդու իրավունքների պաշտպանության և հայկական անկախությունն ու ժողովրդավարությունը սատարելու գործում»:

Խորհրդարանականը հավելել է՝ սա պատերազմ է հայ ժողովրդի դեմ, և այս իրավիճակում ինքը սատարում է Հայաստանին, քանի որ կան վաղեմի կապեր Բուլղարիայի և Հայաստանի ժողովուրդների միջև.«Սա ահաբեկչություն է Հայաստանի իշխանությունների ու ժողովրդի նկատմամբ: Եվրահանձնաժողովին հարկավոր է կույր չգտնվել: Ես կարծում եմ` Եվրահանձնաժողովը պետք է սատարի ինքնիշխան հայկական պետությանը»:

Իր հերթին,‹‹Հայաստանի եվրոպացի բարեկամներ›› կազմակերպության Խորհրդատվական խորհրդի անդամ, Եվրախորհրդարանի ֆրանսիացի պատգամավոր Միշել Ռիվազին, իր հերթին, հայտարարել է. ‹‹Ես ցնցված եմ նման բռնությունից: Մեզ հայտնի է Լեռնային Ղարաբաղի և Ադրբեջանի միջև գոյություն ունեցող պատմական թշնամության մասին, բայց այս անգամ այդ թշնամությունն ուղիղ գծով ուղղված է Հայաստանին: Սա անընդունելի է: Եվրոպական հանձնաժողովը պարտավոր է դատապարտել Ադրբեջանի գործողությունները և պատժամիջոցներ կիրառել դրանց հանդեպ: Այս խնդիրը միայն Հայաստանի և Ադրբեջանի մինջև չէ: Թե՛ եվրոպական, և թե՛ միջազգային այլ կառույցներ պարտավոր են դատապարտել այս գործողությունները››:

Սեպտեմբերի 24-ի երեկոյան Ադրբեջանի կողմից Տավուշի մարզի սահմանամերձ գյուղերի գնդակոծության հետևանքով զոհվել էր երեք կին, ևս չորս գյուղացի վիրավորվել էին: Զոհվածներն են 83-ամյա Պայծառ Աղաջանյանը, 94-ամյա Շուշան Ասատրյանը, 41-ամյա Սոնա Ռևազյանը: Սեպտեմբերի սկզբին Ադրբեջանը մի քանի օր ինտենսիվ գնդակոծության է ենթարկել հայկական գյուղերը՝ կիրառելով խոշոր տրամաչափի գնդացիրներ, զենիթային թնդանոթներ, նռնականետներ, ականանետներ, 107-մմ ռեակտիվ հրետանային կայանքներ: Բացի զինծառայողներից, գնդակոծությունների ընթացքում վիրավորվել է նաև հինգ խաղաղ բնակիչ: Բացի այդ, զգալի վնաս է հասցվել բազմաթիվ բնակելի տներին ու համայնքային նշանակության շինություններին: Սեպտեմբերի 24-ին հայկական բանակի պատասխան գործողություններում ոչնչացվել է Պառավաքար գյուղի հարևանությամբ տեղակայված ադրբեջանական մարտական հենակետը, զոհվել էր հինգ ադրբեջանական զինվոր:

Իր հերթին, «Հայաստանի եվրոպական բարեկամներ» կազմակերպության խորհրդատվական խորհրդի անդամներից ֆրանսիացի պատգամավոր Ֆրանսուա Ռոշբլուանը հայտարարել է՝ այնպիսի օր կամ գիշեր չկա, որ Ադրբեջանը չկրակի՝ օրեցօր հզորացող զենքով:

«Պատերազմն ինքնին անթույլատրելի է, քաղաքացիների ուղղությամբ կրակելը անթույլատրելի է: Կրակում են զինվորների վրա, թեև Ադրբեջանի և Ղարաբաղի միջև հրադադար է գործում, ինչը պետք է արդեն դատապարտվի», - ասել է Ռոշբլուանն ու ընդգծել, որ մյուս կողմից` սա չի զարմացնում: Արդեն տևական ժամանակ Ադրբեջանը քանիցս կրակ է բացել Լեռնային Ղարաբաղի հետ շփման գծում:

Ֆրանսիացի խորհրդարանականը նոր է վերադարձել Արցախից.«Այս ամիս չեմ եղել առաջնագծում, բայց այնտեղ եղել եմ մայիսին: Ես տեսել եմ իրավիճակը, լսել եմ մոտակայքում հնչող կրակոցների ձայնը: Զինվորներ եմ սպանվում, իսկ այսօր նրանք արդեն քաղաքացիների ուղղությամբ են կրակում: Դա ընդհանրապես անընդունելի է: Սա Ադրբեջանի կողմից ճակատային հարձակում է Հայաստանի վրա:

Կոչ եմ անում Ֆրանսիային և նրա կառավարությանը, ինչպես նաև երկրի արտգործնախարարին` միջամտել և ճնշում գործադրել Ադրբեջանի արտգործնախարարության վրա` համոզվելու, որ այս անթույլատրելի գործողությունները դադարեցվելու են: Դա պետք է անել շատ շուտ: Երբ տեսնում եմ որոշ ֆրանսիացի պատգամավորների Ադրբեջանին աջակցելիս, դա անընդունելի եմ համարում»։

Սեպտեմբերի 25-ին` ժամը 17:30-ի սահմաններում, ադրբեջանական զինուժի կողմից թուրքական արտադրության TR-107 կայանքներից հրթիռահրետանային արկակոծման է ենթարկվել Լեռնային Ղարաբաղի պաշտպանության բանակի հյուսիսարևելյան ուղղությամբ տեղակայված զորամասերից մեկի պահպանության տեղամասը: ՊԲ մամուլի ծառայության փոխանցմամբ, բեկորային մահացու վիրավորում են ստացել ՊԲ զինծառայողներ Նորայր Միքայելի Խաչատրյանը (ծնված 1995թ.), Ռոբերտ Սուրենի Մկրտչյանը (ծնված 1995թ.), Հարութ Մաքսիմի Հակոբյանը (ծնված 1997թ.) և Կարեն Գևորգի Շահինյանը (ծնված 1997թ.): Կան վիրավորներ:

 Ուշագրավ
Նա նաև ասել է, որ տարածաշրջանային անվտանգությունը պետք է ապահովեն տարածաշրջանի երկրները
Նա հավելել է, որ թուրքական կողմն ավարտել է Նախիջևանի և Կարսի միջև 224 կմ երկարությամբ երկաթուղային գծի կառուցումը
Փետրվարի 1-ին Միջազգային քրեական դատարանը իրավասություն է ստանալու հետաքննել Ալիևի գործողությունները
Նա նշել է, որ դիտարկում է հայկական բանակին «ոչ մահաբեր ձևաչափով» աջակցություն ցուցաբերելու հնարավորությունը, բայց կոնկրետ որոշումներ չկան
---