Դոնչենկո.՝ ՌԴ-Հայաստան համագործակցությունը դիտարկում ենք եվրասիական ինտեգրման համատեքստում

PanARMENIAN.Net - Հայաստանում ՌԴ առևտրային ներկայացուցիչ Աննա Դոնչենկոն հայտարարել է, որ ռուս-հայկական երկկողմ հարաբերությունները զարգանում են առավելապես Եվրասիական տնտեսական միության շրջանակներում, ինչը համապատասխանում է երկու երկրների արտաքին տնտեսական շահերին։

«Ընդհանրապես, խոսելով երկկողմ համագործակցության մասին, մեծ գաղտնիք չեմ բացահայտի, եթե ասեմ, որ մենք այն ավելի ու ավելի հաճախ ենք դիտարկում նաև եվրասիական ինտեգրման համատեքստում։ Արդյունաբերական համագործակցության, նոր հնարավորությունների ու շղթաների կառուցման տեսանկյունից։ Եվ այն նախագծերի, որոնք առկա են Միության տարածքում, ինչպես նաև այն առաջնահերթ խնդիրների, որոնք ունեն ԵԱՏՄ անդամ երկրները», — ընդգծել է Դոնչենկոն, հայտնում է Sputnik Արմենիան։

Նրա խոսքով՝ Հայաստանի և Ռուսաստանի միջև տնտեսական համագործակցությանը նոր թափ հաղորդելու համար անհրաժեշտ է կենտրոնանալ ծառայությունների և կապիտալի ազատ շարժի վրա ԵԱՏՄ-ում, արդյունաբերական համագործակցության զարգացման վրա, ինչպես նաև միջսահմանային համակարգային նախագծերի մեկնարկի վրա։

Դոնչենկոն նշել է, որ Հայաստանը ցուցաբերել է տնտեսության բարձր դիվերսիֆիկացիայի, լիբերալիզացիայի և արդյունաբերական ներուժի մակարդակ, ինչը նպաստել է նրա ինտեգրմանը համաշխարհային տնտեսությանը։ Նրա գնահատմամբ՝ համագործակցության նոր ձևաչափը բխում է Հայաստանի և Ռուսաստանի արտաքին տնտեսական շահերից։

Նա կարևորել է նաև ԵԱՏՄ գործարար համայնքի ակտիվ ներգրավվածությունը ինտեգրման գործընթացում։ Դոնչենկոյի խոսքով՝ առանցքային նշանակություն ունի համատեղ նախագծերի աջակցությունը, ավելացված արժեքի շղթաների ձևավորումը՝ հիմնված միության ներսում գործող համաձայնեցված կանոնների և նորմերի վրա, այդ թվում՝ գերմիջազգային մակարդակով։

«Ես կցանկանայի, որ արդյունաբերական համագործակցությունը, որպես այդպիսին, երկկողմ համագործակցության և նախագծային աշխատանքի շրջանակում դիտարկվեր բացառապես երկարաժամկետ հեռանկարում։ Քանի որ դա թույլ կտա մշակել արդյունավետ մեխանիզմներ՝ երկրների միջև արդյունաբերական կապերի աջակցման և զարգացման համար, ինչը կնպաստի նաև տեխնոլոգիական առաջընթացին», — ասել է Դոնչենկոն։

Ավելի վաղ Ռուսաստանի նախագահի մամուլի քարտուղար Դմիտրի Պեսկովը հայտարարել է, որ Ռուսաստանի և Հայաստանի հարաբերությունները չեն դադարել և չեն կարող դադարել։ Նա ընդգծել է, որ Հայաստանը մնում է բարեկամական երկիր Ռուսաստանի համար, որի հետ երկկողմ, պատմական, մշակութային և ԵԱՏՄ-ի շրջանակներում ինտեգրացիոն ոլորտում կապերը խորն են։