Յոգան` օգնական

PanARMENIAN.Net - Ասանաների ներգործությունն օրգանիզմի վրա ուսումնասիրել են Դ. էբերտը, Վ.Ռահխը, Ա. Սաֆրոնովը, Ռ. Մինվալեևը և այլ գիտնականներ: Օրինակ, հումորալ մեխանիզմը առանձնացրել է էբերթը: Նա ցույց է տվել, որ ասանաների կատարման ժամանակ հիդրոստատիկ ճնշման փոփոխությունը օրգանիզմի տարբեր խոռոչներում ազդում է օրգանիզմի համակարգերի ֆիզիոլոգիական գործունեության վրա: Զախարյինայի և Գեդայի աշխատություններում ուսումնասիրվել է ռեֆլեկտորային մեխանիզմը, երբ ֆիզիկական մարմնի մասերի ձգումից ու կծկումից հետո խթանվում է արյան շրջանառությունը, ինչն անմիջական ազդեցություն է ունենում տարբեր օրգանների վրա: Բացի այդ, առանձնացնում են նաև մարդու օրգանիզմի վրա ասանաների ազդեցության սթրեսային և հորմոնալ մեխանիզմները:

Ասանաները կարելի է բնորոշել ըստ կատարման եղանակի` նստակյաց դիրքեր, պառկած, շրջված, ծալված, տարբեր կողմեր թեքումներով, հավասարակշռության դիրքեր:

Ասանաները հարկավոր է կատարել քաղցած ժամանակ կամ ուտելուց մի քանի ժամ անց: Վարժություններով կարելի է զբաղվել փոքր գորգի կամ հատակի վրա: Պարապմունքներն անցկացվում են բոբիկ:

Ներքոնշյալ ասանաները կարելի է կատարել առանց հրահանգչի: Ասանաները օգտակար կլինեն, նույնիսկ եթե կատարվեն ոչ այնքան ճշգրիտ կամ հստակ: Այդ պարզ ասանաները թույլ կտան ավելի լավ ճանաչել սեփական մարմինը, ուղղության կտան զարգացման համար:

Ասանա կատարելիս` պետք է զգալ, թե ինչպես են ձգվում մկաններն ու վերջույթները:

Ասանաներ սկսնակների համար

1. Ծառի դիրք (Վրիկշասանա)

Ուղիղ կանգնել. ներշնչելիս դանդաղ բարձրացնել ձեռքերը` առավելագույնս ձգելով դեպի վեր: Հավասար ձեռքերը տարածել հետ դեպի գլխի ետևը, բացելով կրծքավանդակը: Ուժեղացնելու և զարգացնելու համար բալանսի զգացողությունը, հարկավոր է բարձրացնել ծալված ոտքը, ոտնաթաթը դնելով ազդրին: Այս ասանան սլացիկ կեցվածք է հաղորդում և ամրացնում է ողնաշարը, վերացնում հարթաթաթությունը, ամրացնում է ոտքերի մկանները: Բարձրացված ձեռքերով տարբերակում` մեծանում է թոքերի ծավալը, նվազում է ուսերի կծկվածությունը: Եթե ձեր վեստիբուլյար ապարատը վատ է զարգացած, կատարեք ծառի դիրքը պատի մոտ` թիկունքով հենվելով պատին: Միայն որոշ ժամանակ անց, երբ վստահություն կզգաք, կարող են չհենվել պատին: Ծառի դիրքում հարկավոր է մնալ առնվազն մի քանի վայրկյան, սակայն աստիճանաբար ասանայի կատարման ժամանակը պետք է ավելացնել: Հակացուցումներ` բացակայում են:

2. Երեխայի դիրք (Բալասանա)

Ծնկները ծալած վիճակով նստել ոտքերին, խոնարհվել առաջ ու ձեռքերն ուղիղ հետ տանել։ Բալասանան արդյունավետ հանգստացնում է նյարդերը, պայքարում է սթրեսի և հոգնածության դեմ: Գլխի տակ հենակ ունենալու դեպքում թեթևություն կզգացվի թիկունքում և պարանոցի շրջանում, կթեթևանա գլխացավը: Բալասանան նաև հանգստի դիրք է: Կարելի է մնալ 30 վայրկյանից մինչև մի քանի րոպե:

Հակացուցումներ` հղիություն և ծնկի վնասվածքներ:

3.Լեռան դիրք կամ «դունչը կախ շան դիրք» (Ադհո Մուքհա Շվանասան)

Կռանալ և ձեռքերի ափերը դնել հատակին: Հետո բարձրացնել կոնքերն ու կրունկներով հետ գնալ: Քաշը պետք է հավասար բաշխվի ափերի և ոտնաթաթերի միջև: Գլուխն իջեցնել արմունկից ցած: Այս ասանան թույլ կտա լիովին կամ մասնակիորեն ձերբազատվել ողնաշարի հետ կապված խնդիրներից, առավել ճկուն կդարձնի մարմինը, իսկ նյարդային համակարգը` կայուն սթրեսների հանդեպ, ինչպես նաև ավյունով և էներգիայով կլցնի ամբողջ մարմինը` ձեռքերի մատներից մինչև ոտնաթաթ: Այս դիրքում հարկավոր է մնալ 30 վայրկյանից մինչև 1-3 րոպե, կախված պատրաստվածության աստիճանից:

Հակացուցումներ` Ազդրի հետին մասի մկանների վնասվածքներ, դաստակի հետ կապված խնդիրներ, միջողնշարային սկավառակների վնասվածքներ, դաշտան:

4. Կամրջի դիրք (Սետու Բադհասանա)

Պառկեք մեջքին, ծալեք ոտքերը, ոտնաթաթերը կոնքերի լայնությամբ, ձեռքերը մարմնի երկայնքով: Բարձրացրեք հետույքը և կորացրեք մեջքը, սակայն ուսերը, պարանոցն ու ձեռքերը պետք է մնան հատակին: Այս ասանայի կատարման ժամանակ հետևեք, որպեսզի ձեր ծնկները ուղիղ դեպի առաջ ուղղված լինեն:

Սետու Բադահսանան օգնում է թոքերի բորբոքման, հիպերտոնիայի, գաստրիտի, օսթեոխոնդրոզի, լյարդի հիվանդությունների և նույնիսկ անգինայի ժամանակ: Ասանայի կանոնավոր կատարումը ամրացնում է մեջքի, որովայնի և պարանոցի մկանները, նպաստում է փոքր կոնքի օրգանների երիտասարդացմանը, հանում է գլխացավն ու թուլացնում է:

Ասանան հարկավոր է կատարել 8-12 անգամ: Աստիճանաբար կարելի է հասցնել 2 րոպեի:

Հակացուցումներ` ողնաշարի վնասվածքներ, հատկապես պարանոցի շրջանում, հղիություն:

5. Աղեղի դիրք (Դհանուրասանա)

Պառկել փորի վրա, ծալել ծնկները, բարձրացնել սրունքները, ձեռքերը տանել մեջքի հետևն ու բռնել ոտնաթաթերը: Ներշնչել, առավելագույնս կտրվել հատակից, գլուխը որքան հնարավոր է դեպի հետ տանել: Արտաշնչելիս բաց թողնել ոտնաթաթերը, դանդաղ իջեցնել իրանն ու թուլանալ:

Դհանուր ասանան դասվում է յոգայի այն դիրքերին, որոնք վերադարձնում են ողնաշարի ճկունությունը: Այն նաև տոնուս է հաղորդում որովայնի օրգաններին, օգնում է շտկել մեջքի դեֆեկտները:

Դիրքը պետք է պահել 20 վայրկյանից մինչև 1 րոպե:

Հակացուցումներ` ճողվածք, ստամոքսի տուբերկուլոզ, վահանաձև գեղձի հիպերֆունկցիա, ստամոքսի կամ 12-մատնյա աղիքի խոց, ողնաշարի շեղում: Ճողվածքների և հիպերտոնիայի հակում ունեցող մարդիկ պետք է կատարեն ասանան շատ զգուշությամբ, խորհուրդ չի տրվում նաև դաշտանի ժամանակ: