Հեպատիտի նոր ենթատեսակը տարածվում է երեխաների շրջանում

Հեպատիտի նոր ենթատեսակը տարածվում է երեխաների շրջանում

Ինչ է այն ու ինչպես պայքարել` հայտնի չէ

Մեզ հայտնի ու անհայտ բոլոր հետևանքներից զատ կորոնավիրուսը փոխել է նաև մարդկանց ընկալումներն ու արձագանքն աշխարհում տարածվող կամ հայտնաբերվող նոր վիրուսների ու հիվանդիությունների հանդեպ: Այդ արձագանքները երբեմն գուցե չափազանցված են, բայց հաճախ էլ՝ տեղին ու նախազգուշացնող: Այստեղ մեծ է նաև մեդիայի և սոցցանցերի ազդեցությունը:

PanARMENIAN.Net - Վերջին օրերին առողջապահական թոփ թեման ԱՀԿ-ի նոր հայտարարությունն է: Առողջապահության համաշխարհային կազմակերպությունն ահազանգում է՝ հեպատիտի նոր ենթատեսակ է հայտնաբերվել:

Հեպատիտը հայտնաբերվել է 200-ից ավելի երեխայի մոտ՝ աշխարհի արդեն 11 երկրում: Մեկ երեխա մահացել է: Առաջին 5 դեպքը գրանցվել է մարտի 31-ին՝ Շոտլանդիայում: Առաջին դեպքերն արդեն իսկ կասկած են առաջացրել, որովհետև շոտլանդացի բժիշկների պնդմամբ՝ անհայտ հեպատիտով տարեկան առավելագույնը 5 դեպք են ունենում: Մեկ օրում նույնքան դեպքն արդեն մտահոգության առիթ է դարձել: Վիրուսային հեպատիտների 5 տեսակ կա՝ A, B, C, D և E: Սրանցից և ոչ մեկը երեխաների մոտ չի գրանցվել: Միացյալ Թագավորությունում արդեն գրանցվել է հեպատիտի նոր ենթատեսակի 114 դեպք:

Նոր տեսակը հասել է նաև Իսպանիա (13 դեպք), Իսրայել (12 դեպք), Միացյալ Նահանգներ (9 դեպք), մի քանի դեպք գրանցվել է նաև Դանիայում, Իտալիայում, Բելգիայում, Ֆրանսիայում և եվրոպական ևս մի քանի երկրում: Առեղծվածային հիվանդությունը տարածվել է 1 ամսականից մինչև 16 տարեկան երեխաների շրջանում, երեխաների մեծ մասը մինչև 1-10 տարեկան է: Տարբեր երկրների տվյալները հավաքագրելով՝ ԱՀԿ-ն փաստում է, որ երեխաների ճնշող մեծամասնությունն առողջական խնդիրներ նախկինում չեն ունեցել:

Մինչև հեպատիտի ախտանշանների ի հայտ գալը, երեխաները դժգոհել են որովայնի ցավից, մեծ մասն ունեցել է փորլուծություն և սրտխառնոց: Անհայտ ծագման հեպատիտով վարակված երեխաների 10 տոկոսի վիճակն այնքան ծանր է եղել, որ լյարդի փոխպատվաստման կարիք է առաջացել:

Հեպատիտը լյարդային հյուսվածքների բորբոքումն է: Քրոնիկ հեպատիտը կարող է ավարտվել սուր լյարդային անբավարարությամբ: Հիվանդությունը կարող է հանգեցնել նաև լյարդի ցիռոզի և քաղցկեղի: Հետազոտությունները ցույց են տալիս, որ առողջ երեխաների շրջանում հեպատիտի դեպքերը հազվադեպ հանդիպող երևույթ են:

Հիմա պատճառների մասին, ավելի ճիշտ՝ դրանք չգտնելու: Մասնագետների ամենամեծ մտահոգությունն այն է, որ նոր ենթատեսակի պատճառներն ու փոխանցման ուղիներն անհայտ են, հետևաբար պարզ չէ, թե ինչպես կանխել կամ բուժել հիվանդությունը: Քանի որ վերջին շրջանում բոլոր հիվանդություններն ու վիրուսներն այս կամ այն կերպ կապում են քովիդի կամ պատվաստանյութերի հետ, մասնագետներն առաջին հերթին բացառում են հենց այս վարկածը: Կորոնավիրուսի դեմ պատվաստանյութերը չէին կարող նոր ենթատեսակի պատճառ դառնալ, որովհետև վարակված երեխաների մեծ մասը տարիքային սահմանափակումների պատճառով պատվաստված չէին կարող լինել:

Այս փուլում հնարավոր ամենատրամաբանական վարկածն ադենովիրուսներն են: Բժիշկները պարզել են, որ առեղծվածային հիվանդության ախտորոշմամբ երեխաների մի մասը վարակված են նույն տեսակի ադենովիրուսով: Մյուս կողմից, դա բավարար չէ հեպատիտի ծանր դեպքեր գրանցելու համար: Կա մեկ այլ՝ անհայտ գործոն, որը ծանրացնում է հիվանդությունը: Հետազոտողների մի խումբ կարծում է, որ վերջին առնվազն երկու տարում լոքդաունների և պաշտպանիչ դիմակների պատճառով երեխաների իմունային համակարգը թուլացել է: Մյուսներն էլ փորձում են կապ գտնել կորոնավիրուսով վարակված դեպքերի և հեպատիտի նոր ենթատեսակի միջև: Սկզբնական այս փուլում անհայտ հեպատիտի տարածման տեմպի, պատճառների և հետևանքների մասին տեղեկությունները թարմանում են ամեն օր:

 Ամենաընթերցվողը բաժնում
Ինչպես միանալ ոլորտի առաջատար միջազգային ընկերությանը
Ինչպես է աշխարհը լուծում օրգանների փոխպատվաստման խնդիրը
Արևմուտքի սանկցիաները խփում են նաև ռուսական դեղարտադրությանը
Մարտի 8-ին՝ սթափության լրացուցիչ չափաբաժին
 Ուշադրության կենտրոնում
Բեգլարյան․ Ազատության հրապարակում Արցախի ժողովրդի կարիքների ապահովման համար հանրահավաք կանցկացվի

Բեգլարյան․ Ազատության հրապարակում Արցախի ժողովրդի կարիքների ապահովման համար հանրահավաք կանցկացվի Հավաքի նպատակն է քննարկել ու բարձրաձայնել Արցախի ժողովրդի առաջարկներն ու պահանջները

 Բաժնի այլ նյութերը
Հայրենիքը՝ հեծանիվի դիմաց Ինչ արժե պետությանը դավաճանելը
Յոթ որդու Բավական քույրը Տարեկան քանի՞ աղջիկ չի ծնվում Հայաստանում
Վարորդներին ԳԱԶազացրին Ինչ է կատարվում վառելիքի շուկայում
---