Չելյաբինցի «մուժիկ» Դորնը

Չելյաբինցի «մուժիկ» Դորնը

Ով է նա և ինչու չի կարելի բաց թողնել երգչի երևանյան համերգը

Հայտնի ուկրաինացի երգիչ Իվան Դորնը հունիսի 3-ին համերգով հանդես կգա Երևանում: #Randorn հեշթեգով բաց համերգը նրա համանուն ալբոմի մոտիվներով, որը թողարկվել է 2014-ին, տեղի կունենա Dalma Garden Mall-ի տարածքում: PAN-ը հավաքել է երգչի կյանքի առավել հետաքրքրական դրվագները և պատմում է, թե ինչու չի կարելի բաց թողնել նրա երևանյան համերգը:

PanARMENIAN.Net - Չելյաբինցի «մուժիկ» Դորնը

«Հավանաբար, ես հաճախ եմ նեղացնում մարդկանց: Նախկինում դա ավելի հազվադեպ էր պատահում: Հիմա ես արդեն այդքան հանդուրժող չեմ, սկսել եմ ավելի հաճախ ճշմարտությունը մարդկանց երեսին ասել»:

Դորնը ծնվել է Չելյաբինսկում, իսկ 2 տարեկան հասակում ծնողների հետ տեղափոխվել է Ուկրաինա: Հիշելով Իվանի ծագման մասին, ընկերները հաճախ են նրան Իվան Դուլին անվանում՝ հումորային «Մեր Russia»-ի հերոսի անունով:

28-ամյա ուկրաինացի երգիչը, դիջեյն ու հեռուստահաղորդավարը մանկուց է հասկացել, որ երգն է իր կոչումը: Առաջին անգամ փոքրիկ Դորնը, այն ժամանակ դեռ՝ Երյոմինը (հոր ազգանունով, Դորն նա դարձավ ավելի ուշ՝ վերցնելով մոր ազգանունը, երբ հայրը լքեց ընտանիքը) բեմ է դուրս եկել 6 տարեկանում: Դորնը երաժշտական կրթություն է ստացել (դաշնամուր), նա բազմաթիվ երաժշտական մրցույթների հաղթող է և դափնեկիր, այդ թվում. մոսկովյան «Վառիր քո աստղը» մրցույթի 1-ին տեղ, «Ղրիմի մարգարիտը»՝ հանդիսատեսի համակրանքի մրցանակ, 2001թ. «Սևծովյան խաղերի» 3-րդ տեղ, 2005-ին՝ նույն մրցույթի 2-րդ մրցանակային տեղ: Դորնը մանկուց նաև շատ սպորտային է եղել, զբաղվել է մեծ թենիսով, ֆուտբոլով, լողով, թեթև աթլետիկայով, պարահանդեսային պարերով, նույնիսկ շաշկիով ու շախմատով:

«Պետք չէ ամաչել»

«Երաժշտությունն աշխարհում ամենաբուռն զարգացող ինդուստրիան է՝ բժշկության և ռազմական ոլորտների հետ մեկտեղ: Երաժշտությունն այդքան արագ է զարգանում, որովհետև չունի սահման ու շրջանակ, կարող ես անել ինչ ուզես: Սահմանափակումներ լինում են այն դեպքում, երբ երաժշտությունը հակասում է իմ ճաշակին, երբ զգում եմ, որ դա իմը չէ, ինձ այն դուր չի գալիս»:

Դորնը շոու բիզնես մտավ որպես ուկրաինական M1 ալիքի հեռուստահաղորդավար, ոչ թե երգիչ: Իսկ երաժշտությամբ պատահաբար է սկսել զբաղվել, որքան էլ տարօրինակ հնչի: 2007-ին Jamiroquai-ի համերգին Դորնը ծանոթացավ «Նորմալների զույգը» նախագծում իր ապագա գործընկերուհու՝ Աննա Դոբրիդնևայի հետ: Նախագիծը 2 տարվա կյանք ունեցավ, որից հետո Դորնը որոշեց չերկարացնել պայմանագիրն ու 2010-ին մենակատարի կարիերա սկսեց՝ արմատապես փոխելովիմիջն ու երաժշտության ուղղվածությունը: Հենց այդ ժամանակ էր, որ երիտասարդ երգիչը պարզ ու հասկանալի երգերով «յուրային տղայից» փոխակերպվեց օրիգինալ հիթերով ու հաճախ անընկալելի տեքստերով «տարօրինակ նորարարի»: Դորնի երգերը ճանաչում ստացան, այդ թվում «Ստիցամենը», «Բիգուդին», «Հյուսիսափայլը», «Առավել ևս»-ը և մյուսները:

Նա հայտնի դարձավ «Ստիցամեն» ոչ այնքան հասկանալի անվանում ունեցող հիթով, որը դուրս եկավ Ուկրաինայի և Ռուսաստանի սահմաններից և հնչում էր յուրաքանչյուր դինամիկից նույնիսկ Հայաստանում: Ի դեպ, ակումբային սլենգով «ստիցամեն» են կոչում այն տղային, որն առաջինն է դուրս գալիս պարահրապարակի կենտրոն և հորդորում է հյուրերին միանալ իրեն, երբ բոլորը դեռ ամաչում են պարել երեկույթի սկզբում: Դորնը 3 ստուդիական ալբոմ ունի՝ Co'n'dorn, Randorn-ն ու Open-ը, և 1 համերգային Jazzy Funky Dorn ալբոմը:

Սկանդալային Դորնը

«Քննադատությանը վերաբերվում եմ, պատկերավոր ասած, ինչպես վեր պարզած միջնամատին»:

Դորնը միշտ դրական արձագանքներ է ստացել: Ըստ հեղինակավոր ԶԼՄ-ների մի շարք մեկնաբանների, Դորնը շահեկան դիրք ունի «տեղական փոփ բեմի մշտական գավառական» ֆոնին, նրան են պատկանում «համաշխարհային միտումներին ամենահամարժեք, ամենահիշվող և ամենահետաքրքիր ռուսալեզու փոփ երգերը»:

Նոր անգլալեզու Open the Dorn ալբոմի վրա աշխատելիս, որը ձայնագրվել է Ամերիկայում 3 ամսում, Դորնը փոխեց իմիջը՝ սափրելով գլուխն ու մորուք թողնելով: Ալբոմի ձայնագրությունից հետո, 2017-ի ապրիլին Դորնը «առանց գրաքննության» ամենասկանդալային հարցազրույցը տվեց ռուսաստանցի լրագրող Յուրի Դուդին: Երգչի հարցազրույցից առանձին արտահայտություններ մեծ աղմուկ բարձրացրին. Դորնը ասել էր, թե Ռուսաստանի և Ուկրաինայի պատերազմն ուղղակի «վեճ է», իսկ 2014-ի «Նոր ալիքում» Ուկրաինայի զինանշանով շապիկը, որը նա կրում էր «Պինգվինի պարը» երգի կատարման ժամանակ, ստիպված էր հագել, որ «հագուստի պատճառով ոչ ոք «չհոտի»:

Արձագանքը կայծակնային էր. երգչի դեմ քննադատության ու վրդովմունքի ալիք բարձրացավ, իսկ սոցցանցերի օգտատերերը «թաղեցին» նրա կարիերան:

Մայիսի 31-ին Դորնը տեսաուղերձ հրապարակեց բանաստեղծության տեսքով՝ հասցեագրված բոլոր նրանց, ով քննադատել էր իրեն ՌԴ և Ուկրաինայի հակամարտության մասին խոսքերի համար: «Ազատ մարդ եմ՝ անտեսեցի լրատվական պատի հետևում կքած ճորտին»:

Դորնը պարզաբանել է, որ երաժիշտ է մնում և մտադիր չէ հանձնվել: Բանաստեղծության վերջում երգիչը հավելել է, որ իր ուկրաինական անձնագիրը միշտ իր հետ է:

Յուլիաննա Լալաբեկովա / PanARMENIAN.Net
 Ամենաընթերցվողը բաժնում
Ի՞նչ է պլանավորում անել Netflix-ը՝ բաժանորդներին վերադարձնելու համար
«Երեք շիշ գինի»՝ նոր ձևաչափ առանց սահմանների
Վանդալիզմի զոհ դարձած արվեստի ամենահայտնի գործերը
Գագոսյանի ճանապարհը՝ հոլիվուդյան ֆիլմի մոտիվներով
 Ուշադրության կենտրոնում
Երևան-Լիոն գործակցության հեռանկարում Կոնդի վերակառուցումն առանցքային կլինի

Երևան-Լիոն գործակցության հեռանկարում Կոնդի վերակառուցումն առանցքային կլինի Տիգրան Ավինյանն ու Գրեգորի Դուսեն այցելել են պատմական թաղամաս

 Բաժնի այլ նյութերը
Դեգան, Սարյանն ու Ուրարտուն Մշակութային յուրացում՝ մեծերի թեթև ձեռքով
Սկանդալն Օսկարի երկրորդ անունն է Կինոաշխարհի ամենաքննարկվող մրցանակաբաշխության դեպքերն ու դեմքերը
---