«Թավշյա» հեղափոխության առաջին 12 օրը

«Թավշյա» հեղափոխության առաջին 12 օրը

Թվապատում

Ապրիլի 13-ից Երևանում մեկնարկեցին ՀՀ երրորդ նախագահ Սերժ Սարգսյանի վարչապետության դեմ պայքարող ընդդիմադիր ուժերի՝ «Քաղաքացիական պայմանագիր» (ՔՊ) կուսակցության «Իմ Քայլը», «Մերժիր Սերժին» նախաձեռնությունների և «Հանուն Հայաստան պետության ճակատի» հավաքները, քայլերթերն ու բողոքի այլ ակցիաներ: ՔՊ-ի «Իմ քայլը» նախաձեռնությունը պայքարը սկսել էր ավելի վաղ. կուսակցության անդամները և փոքրաթիվ համախոհներ 14-օրյա քայլարշավի էին դուրս եկել Հայաստանի տարբեր քաղաքներում և հեռավոր համայնքներում: Նրանք ապրիլի 13-ին հասան Երևանի հյուսիսային ավտոկայան: Բողոքի ոչ բռնի զանգվածային ակցիաների 11 օրը՝ ձերբակալություններից, ոստիկանության կողմից ուժի կիրառումից, երկխոսության բազմաթիվ կոչերից և ձախողված բանակցություններից հետո, Նիկոլ Փաշինյանի հայտարարած «թավշյա» հեղափոխության առաջին նպատակն իրագործվեց՝ ՀՀ նորանշական վարչապետ Սերժ Սարգսյանը՝ պաշտոնավարելով ընդամենը յոթ օր, հրաժարական տվեց:

PanARMENIAN.Net - PanARMENIAN.Net ը ներկայացնում է ՔՊ-ի «Իմ քայլը» նախաձեռնության քայլաշավից մինչև ապրիլի 26-ը` ընդդիմության բողոքի ակցիաների առաջին 12 օրվա մասին պատմող ուշագրավ փաստերը՝ թվերով:

Մինչև ապրիլի 13-ի հանրահավաքի մեկնարկը՝ ՔՊ-ի վարչության անդամ, ԱԺ ԵԼՔ խմբակցության պատգամավոր Նիկոլ Փաշինյանն իր համախոհների հետ քայլարշավ էր սկսել Գյումրիի Վարդանանց հրապարակից: 14 օրում նրանք հաղթահարել են 200 կիլոմետր, անցնելով Հայաստանի խոշոր և հեռավոր համայնքներով, հասել Երևանի Հյուսիսային ավտոկայան: Այս ընթացքում Փաշինյանն արել է 320.000 քայլ:

Ապրիլի 13-ի երեկոյան Ազատության հրապարակում մեկնարկեց ընդդիմադիր ուժերի բազմամարդ հանրահավաքը: Նիկոլ Փաշինյանը խոսեց խաղաղ քաղաքացիական անհնազանդություն նախաձեռնելու մտադրության մասին: Նույն օրը երեկոյան, ցուցարարները շրջափակելով Ֆրանսիայի հրապարակը, նստացույց սկսեցին այստեղ:

Ապրիլի 14-ին ընդդիմությունը հայտարարեց, որ շրջափակելու է իշխող «Հայաստանի հանրապետական կուսակցության» գլխամասային գրասենյակը՝ խոչընդոտելու կուսակցական վերնախավի մուտքը շենք և խորհրդի նիստում վարչապետի պաշտոնում Սերժ Սարգսյանի թեկնածությունն առաջադրելու որոշման կայացմանը: Սակայն հանրապետականները նիստը տեղափոխել էին Ծաղկաձոր: Ցուցարարներն այդ օրը Փաշինյանի գլխավորությամբ ներխուժեցին Հանրային ռադիոյի շենք, նրանք ուղիղ եթեր պահանջեցին, սակայն չստանալով այն՝ լքեցին ռադիոյի շենքը: Ոստիկանությունը ձերբակալեց 2 հոգու, որոնցից մեկն անչափահաս էր ու ազատ արձակվեց, մյուսը՝ Տիգրան Մազմանյանն ազատ է արձակվել ավելի ուշ՝ ապրիլի 23-ին:

Ապրիլի 15-ի գիշերը Նիկոլ Փաշինյանը Ֆրանսիայի հրապարակում հայտարարեց, որ կամուրջներ, կենսանական նշանակության կոմունիկացիոն այլ հանգույցներ են արգելափակելու: Առավոտյան ցուցարարները արգելափակելով փողոցները կաթվածահար վիճակում պահեցին Կենտրոնի մի շարք փողոցներ և խաչմերուկներ: Փաշինյանը հայտարարեց նաև ԱԺ տանող փողոցներն արգելափակելու մտադրության մասին՝ Սերժ Սարգսյանի և ԱԺ պատագամավորների մուտքը խորհրդարան խոչընդոտելու նպատակով, ինչի արդյունքում պետք է տապալվեր ՀՀ վարչապետի ընտրությունը:

Ապրիլի 16-ի առավոտյան ցուցարարներին չհաջողվեց արգելափակել Ազգային ժողով տանող փողոցները: Նման փորձերի համար ոստիկանությունը բերման ենթարկեց տասնյակ ցուցարարների, մեծ ուժեր կենտրոնացնելով այստեղ՝ ոստիկանները փշալարեր տեղադրեցին: Այդ օրը լարված իրավիճակ ստեղծվեց ցուցարարների և ուժայինների միջև. հրմշտոցի և ոստիկանների կիրառած ձայնային նռնակի հետևանքով եղան վիրավորներ, այդ թվում՝ Փաշինյանը և 6 ոստիկան:

Ապրիլի 17-ին պատգամավորներն անարգել մտան խորհրադարան: ԱԺ արտահերթ նիստում ՀՀ երրորդ նախագահ Սերժ Սարգսյանը 77 կողմ, 17 դեմ ձայներով դարձավ ՀՀ վարչապետ: Նույն օրը երեկոյան Հանրապետության հրապակում տեղի ունեցավ ընդդիմության բազմամարդ հանրահավաքը:

Նիկոլ Փաշինյանը այդ օրը հայտարարեց «թավշյա» և ոչ բռնի հեղափոխության մեկնարկի, ինչպես նաև Հանրապետության հրապարակում հավաքի մասին, որն ըստ նրա, պետք է լիներ անկախ Հայաստանի պատմության ամենաբազմամարդ հավաքը: Սակայն հաջորդող օրերին հավաքի մասնակիցները գնալով շատանում էին:

Ցույցի մասնակիցների թվի մասին տվյալները հակասական են: PanARMENIAN.Net ին ՀՀ ոստիկանությունից հայտնել էին, որ հավաքի մասնակիցների ճշգրիտ թիվը ենթակա չէ հրապարակման: Սակայն անզեն աչքով կարելի է նկատել, որ Հանրապետության հրապարակում վերջին օրերին տասնյակ հազարավոր ցուցարարներ են եղել՝ գերազանցելով նախկինում եղած բոլոր հանրահավաքների մասնակիցների թիվը:

Ապրիլի 18-ին ընդդիմությունը սկսեց մի շարք կառավարական շենքերի շրջափակումը: Մինչ այդ, Սերժ Սարգսյանի գլխավորած կառավարությունում վերանշանակումներ էին անում:

Ապրիլի 19-ի առավոտյան կայանալու էր Սերժ Սարգսյանի գլխավորած կառավարության անդրանիկ նիստը: Այն նախատեսված էր գումարել առավոտյան ժամը 11:00-ին, սակայն կայացավ միայն 17:00-ին: Կարելի է ենթադրել, որ նիստի հետաձգման պատճառը կաթվածահար վիճակում գտնվող Կենտրոնի փողոցներն էին:

Ապրիլի 20-ին՝ ընդդիմության խաղաղ ընդվզման յոթերորդ օրը, գնալով աճող ցուցարարները շարունակում էին արգելափակել փողոցները, կամուրջները:

Ըստ Socialbakers համակարգի, ընդվզման առաջին շաբաթում Փաշինյանի ֆեյսբուքյան էջը հավանել է ավելի քան 13.000 օգտատեր, ընդ որում, միայն ապրիլի 17-ին՝ մեկ օրում, էջը հավանողների թիվն աճել է 6200-ով։ Եթե մարտի 31-ին՝ քայլերթը սկսելու օրը, Փաշինյանն ուներ մոտ 59.000 հավանող, ապա ապրիլի 26-ին ժամը 16:00-ի դրությամբ այն ունի 178.990 հավանող և 203,696 հետևորդ, ինչը գերզանցում է մոտ 67.000 հետևորդ ունեցող ՀՀԿ-ական պատգամավոր Արմեն Աշոտյանի էջին, ինչպես նաև 73.000 հետևորդով երգիչ Ռազմիկ Ամյանի, 61.000-ով՝ Կարգին Հայկոյի էջերին: Այն հետևորդների թվով գերազանցել է նաև ՀՀ նախկին վարչապետ, այժմ ՀՀ վարչապետի պաշտոնակատար Կարեն Կարապետյանի էջին, որն այս պահին ունի մոտ 89.000 հետևորդ։

Ապրիլի 21-ը՝ Սերժ Սարգսյանի վարչապետության դեմ ցույցերի 9-րդ օրը, ավելի լարված էր, քան նախորդը․ ոստիկանները մեքենաներ էին ջարդում և ճոճում, տարբեր համայնքներում քաղաքացիական հագուստով դիմակավորված անձինք ցուցարարների էին ծեծում, Սերժ Սարգսյանը և այլ բարձրաստիճան պաշտոնյաներ երկխոսության կոչեր էին անում՝ անդառնալի կորուստներից խուսափելու համար։ ՀՀԿ պատգամավոր Սամվել Ալեքսյանյանը Մալաթիայում հարվածում էր ցուցարարներին, նախկին պատգամավոր Առաքել Մովսիսյանը՝ ճանապարհներ էր փակում, ԱԱԾ-ն հայտնում էր կանխված ահաբեկչության մասին, փողոց փակած վարորդների դեմ քրգործեր էին հարուցվում:

Այդ օրը Փաշինյանը հանդիպեց ՀՀ նախագահ Արմեն Սարգսյանին, որը երկխոսության առաջարկով եկել էր Հանրապետության հրապարակ: Հանրահավաքի ընթացքում Փաշինյանը հայտարարեց, որ հանդիպելու է Սերժ Սարգսյանի հետ՝ միայն նրա հրաժարականի պայամանները քննարկելու նպատակով:

Ապրիլի 22-ին՝ ընդդիմության ցույցերի 10-րդ օրը, առավոտյան ժամը 10:00-ին «Արմենիա Մարիոթ» հյուրանոցում ԶԼՄ-ների ներկայությամբ մեկնարկեց ՀՀ նորընտիր վարչապետ Սերժ Սարգսյանի և ԱԺ ԵԼՔ խմբակցության պատգամավոր Նիկոլ Փաշինյանի հանդիպումը: Բանակցությունները դեռ չսկսված ավարտվեցին. Փաշինյանը վերջնագիր ներկայացրեց Սարգսյանին, նա էլ հեռացավ: Ընդդիմադիր գործիչը համախոհների հետ շարունակեց քայլերթը դեպի Էրեբունի փողոց:

Էրեբունի-Արցախի փողոց խաչմերուկում ոստիկանության հատուկ ջոկատայինները ձերբակալեցին ԱԺ ԵԼՔ խմբակցության երեք պատգամավորի՝ Նիկոլ Փաշինյանին, Սասուն Միքայելյանին, Արարատ Միրրոզյանին:

Ոստիկանության կողմից բերման ենթարկվողների թիվը օրեցօր աճում էր: Շարժման սկզբում՝ առանձին օրերի բերման ենթարկվածների թիվը հասնում էր մի քանի տասնյակի, իսկ ապրիլի 19-ին այդ թիվը գերազանցեց 100-ը՝ կազմելով 122 բերման ենթարկված: Բերման ենթարկվածների թիվը ռեկորդային էր ապրիլի 22-ին՝ առնվազն 251 հոգի:

Ապրիլի 23-ին՝ հանրային ընդվզման 11-րդ օրը, Սերժ Սարգսյանի հրաժարականից բառացիորեն րոպեներ առաջ շարժմանը միանալու մասին հայտարարություն տարածեց ԱԺ «Ծառուկյան» խմբակցությունը՝ Գագիկ Ծառուկյանի գլխավորությամբ: Հանրապետության հրապարակում հրաժարականից ժամեր անց մեկնարկեց ընդդիմության բազմահազարանոց հանրահավաքը: Այն սկսվեց պաշտոնաթող վարչապետի հայտարարության ընթերցմամբ: «Հայաստանի Հանրապետության ժողովուրդ, քո ցավը տանեմ»,- բղավում էր Նիկոլ Փաշինյանը հարթակից: Նա նաև հայտարեց, որ ապրիլի 25-ի առավոտյան բանակցելու է վարչապետի պաշտոնակատար Կարեն Կարապետյանի հետ:

Ապրիլի 24-ին՝ Հայոց ցեղասպանության զոհերի հիշատակի օրը, Նիկոլ Փաշինյանի գլխավորությամբ քայլերթը շարժվեց Հանրապետության հրապարակից դեպի Ծիծեռնակաբերդ: Ցեղասպանության 103-րդ տարելիցին հուշահամալիր այցելուների թիվն առանձնակի մարդաշատ էր: Ապրիլի 25-ից մեկնարկեց Փաշինյանի հայտարարած «թավշյա» հեղափոխության երկրորդ փուլը. ցուցարարները փողոց դուրս եկան ՀՀԿ-ի և Կարեն Կարապետյանի հեռացման պահանջով:

Կարապետյան-Փաշինյան բանակցությունները չկայացան: «Հրապարակում կան հավաքված մարդիկ, որոնք դժգոհ են ստեղծված իրավիճակից, բայց ինչպե՞ս որոշենք՝ ով է վարչապետի նրանց թեկնածուն», - հայտարարել էր Կարապետյանը: Երկրում այդ օրը շարունակվեցին դասադուլները, գործադուլները բազմահազարանոց երթերը, և ոչ ոք բերման չենթարկվեց:

Մեկը մյուսի հետևից շարժմանը միանալու հայտարարություններ էին տարածում խորհրդարանական և արտախորհրդարանական ուժերը: Օրվա երկրորդ կեսին ՀՅԴ-ն դուրս եկավ ՀՀԿ-ի հետ մոտ մեկ տարվա կյանք ունեցած կոալիցիայից, կայացավ Ծառուկյան-Փաշինյան հանդիպումը:

Երեկոյան հանրահավաքի ընթացքում հրապարակն ընտրեց համաժողովրդական թեկնածուին՝ Փաշինյանին: Նրան վարչապետի պաշտոնում է տեսնում նաև ԵԼՔ դաշինքը:

Ապրիլի 26-ին՝ հանրային ընդվզման 13-րդ օրը, «թավշյա» հեղափոխության առաջնորդների պահանջներն անփոփոխ են, իսկ բողոքի զանգվածային միջոցառումները շարունակվում են:

Նանե Մանասյան / PanARMENIAN.Net
 Ամենաընթերցվողը բաժնում
Ինչպես էր համացանցը կատակում մեծ բանավեճի ընթացքում
Դրանք 1 տարի կոմայում եղած հային արթնանալուց հետո նորից կոմայի մեջ կգցեին
Դեպի արդիականացված արտաքին քաղաքականություն
 Ուշադրության կենտրոնում
Վիտալի Բալասանյան. Թե Փաշինյանը, թե ահաբեկչական «Սասնա ծռերը» մեկ ամբողջություն են

Վիտալի Բալասանյան. Թե Փաշինյանը, թե ահաբեկչական «Սասնա ծռերը» մեկ ամբողջություն են Ըստ Բալասանյանի՝ Նիկոլ Փաշինյանը փորձում է ահաբեկել բոլորին

 Բաժնի այլ նյութերը
«Հանձնվելուց» մեկ տարի անց ՀՀԿ-ն «աղքատացել է», ՔՊ-ն՝ «հարստացել»
Ինչպես Փաշինյանը կարող է հասնել ԱԺ արտահերթ ընտրության Հնարավո՞ր է դա արդյոք առանց կոալիցիոն գործընկերների