007 գործակալ. Բոնդի մասին ֆիլմերի լավագույն 5-յակը

PanARMENIAN.Net - Նոյեմբերի 6-ից Երևանի կինոթատրոններում ցուցադրվում է Ջեյմս Բոնդի մասին 24-րդ` «007. Սպեկտր» ֆիլմը, որը միանշանակ չընդունվեց կինոսիրողների կողմից` ոմանք այն իսկական բեկում համարեցին, մինչդեռ մեծամասնությունը դժգոհեց բզկտված սյուժեից և անլուրջ մատուցումից: Աչքի անցկացնելով Բոնդի մասին ֆիլմաշարը` PanARMENIAN.Net ն ընտրել է Ֆլեմինգի վեպերի էկրանավորումներից 5 լավագույնը:

«Դոկտոր Նոու», 1962 թ.

Կինոհերոսի նոր տեսակը` «հումորի զգացումով օժտված անվախ ասպետը», առաջին անգամ հայտնվեց էկրաններին հեռավոր 1962 թ.: Ջեյմս Բոնդի մասին ֆիլմաշարի նաև երկրորդ և չորրորդ մասերի հեղինակ ռեժիսոր Թերենս Յանգի «Դոկտոր Նոուն» մերօրյա հանդիսատեսին կարող է մի փոքր պարզամիտ թվալ: Սակայն հենց այդ կինոնկարը մշակեց և ներմուծեց քրեական մարտաֆիլմերի միանգամայն նոր ոճը, որը հետագայում հիմք կհանդիսանա կինոպատումների մի ամբողջ սերնդի համար: Մարտաֆիլմերի նոր հերոսը սիրվեց հանդիսատեսի կողմից բացառիկ հաջողակ լինելու, ցանկացած իրավիճակից դուրս գալու ունակության և նույնիսկ ամենաբարդ, թվում է թե, անելանելի վիճակում երբեք չխամրող հումորի զգացողության համար: Անշուշտ, դրան նպաստեց նաև երիտասարդ, այն ժամանակ դեռ 32-ամյա Շոն Քոններիի հմայքը, որ 007 գործակալի առաջին դերակատարն էր և մինչ օրս համարվում է «Բոնդերից ամենաճիշտը»:

«Ռուսաստանից` սիրով», 1963 թ.

Ոգեշնչվելով առաջին ֆիլմի հաջողությամբ` պրոդյուսերները որոշեցին շարունակել 007 գործակալի և «Սպեկտր» համաշխարհային ահաբեկչական կազմակերպության միջև չհայտարարված պատերազմը: Բոնդի երկրորդ առաջադրանքը ռուս գործակալին`«Լեկտոր» գերգաղտնի ծածկագրման սարքի գաղտնիքն իմացող գեղեցկուհուն, ինչպես նաև բուն սարքը, Ստամբուլից փրկելն ու տարհանելն էր: Բավականին հարթ անցնող գործողությանը միջամտում է «Սպեկտրի» մինչ այդ անհայտ թիվ 1 գործակալ Էռնեստ Ստավրո Բլյուֆելդը: Թերենս Յանգը նույն բաղադրատոմսից օգտվեց, ինչ և առաջին ֆիլմում, և չսխալվեց: Չնայած բուն պատմության որոշ պարզամտությանը, հանդիսատեսին գրավեց հերոսի թեթև, անկաշկանդ պահվածքը, որն ամենաբարդ իրավիճակներից վարպետորեն է դուրս գալիս, կարծես ինքն էլ զարմանալով սեփական խելքի և հմտության վրա: Սրամիտ երկխոսությունները, և, անշուշտ, Քոներիի կատարմամբ Բոնդի կերպարի գրավչությունը, նպաստեցին ֆիլմի հաջողությանը, որն համաշխարհային մասշտաբով գերազանցեց սեփական համեստ բյուջեն գրեթե 40 անգամ:

«Գոլդֆինգեր», 1964 թ.

Մեկ տարի անց էկրան բարձրացավ քաջարի հատուկ գործակալի հերթական արկածը, որն այս անգամ մարտնչում էր չարիքի դեմ ի դեմս միջազգային հանցագործ Գոլդֆինգերի, որը մտադիր էր ոչնչացնել ԱՄՆ ոսկե պաշարը և այդպիսով քաոս առաջացնել ամբողջ կապիտալիստական աշխարհում: Գայ Հեմիլթոնի ֆիլմն իրավամբ համարվում է լավագույններից մեկը այդ ֆիլմաշարում, որտեղ հաջողությամբ համադրված են լարված գործողությունները, սրամիտ երկխոսությունները և հեղինակի թեթև հեգնանքն այն ամենի հանդեպ, ինչ նա պատկերում է: Հազվագյուտ դեպքերից մեկը, երբ երրորդ ֆիլմը կարողացավ գերազանցել առաջին երկուսին ինչպես գեղարվեստական, այնպես էլ ֆինանսական տեսակետից: Կինոքննադատներից շատերը համարում են, որ «Գոլդֆինգերը» գերազանցեց նույնիսկ Ֆլեմիգնի վեպը:

«Կազինո Ռոյալ», 2006 թ.

Սա Բոնդի մասին 21-րդ ֆիլմն է, որը հիմնված է սուպերլրտեսի մասին գրողի առաջին վեպի վրա: Ֆիլմը բրիտանացի դերասան Դենիել Քրեյգի դեբյուտն էր 007 գործակալի դերում: ֆիլմը պատմում է անգլիական հետախուզությունում Բոնդի ծառայության սկզբնական շրջանի մասին: Կինոպատումի «վերբեռնումը» Պիրս Բրոսնանի դերակատարմամբ խայտաբղետ ֆիլմերից հետո օգտակար եղավ: Ռեժիսոր Մարտին Քեմփբելը որոշեց օգտագործել 2000-ականների կեսերին նորաձև դարձած «ավելի մռայլ ու իրատեսական» ոճը` զրկելով գլխավոր հերոսին Բրոսնանի դերակատարմամբ Բոնդի դիմակահանդեսային անլրջությունից և վերածելով անպարտելի հերոսին թեև ուժեղ, բայց` մարդու: Հատկապես հիշարժան էին պոկերի լարված տեսարաններն ու անզուգական չարագործը դանիացի Մեդս Միկկելսենի («Հանիբալ») կատարմամբ: Ամբողջ 2006-ի ընթացքում Դենիել Քրեյգի հասցեին բացասական արձագանքների ալիքից, հերոսին «նորացնելու» փորձերի համար ֆիլմերի հեղինակների հասցեագրված քննադատությունից հետո, նոյեմբերին կայացած համաշխարհային պրեմիերայից հետո բոլոր ԶԼՄ-ները փոխեցին տեսակետը և հիացական արձագանքեցին նրա դերակատարմանն ու մարզավիճակին: Կինոքննադատները օվկիանոսի երկու կողմերում գործնականում միակարծիք էին, որ Դենիել Քրեյգն իդեալական թեկնածու է 007 գործակալի համար:

«007. Կոորդինատները «Սքայֆոլ», 2012 թ.

Մարկ Ֆորսթերի «Գթասրտության քվանտի» (22-րդ ֆիլմը) ձախողումից հետո պրոդյուսերները բացառիկ քայլի դիմեցին և հրավիրեցին հայտնի ռեժիսոր Սեմ Մենդեսին: Օսկարակիր բեմադրիչը հայտնի է իր եզակի հեղինակային մոտեցմամբ, ուստի կինոստուդիայի համար սա բավականին ռիսկային քայլ էր: Կինոնկարում զգացվում է Մենդեսին հատուկ գործելաոճը, ինչը բարենպաստ ազդեցություն ունեցավ վերջնական արդյունքի վրա: Անսովոր էր սյուժեի շրջադարձը, երբ առաջին պլան մղվեց «երկրորդ պլանի հավերժ պերսոնաժ» Մ-ը (Ջուդի Դենչ): Մեկնաբաններից շատերը համեմատեցին Քրեյգի գլխավոր դերակատարմամբ երրորդ ֆիլմը Նոլանի «Մութ ասպետի» հետ, որը չափանիշ դարձավ ժամանակակից մարտաֆիլմերի համար: Առանձին հարկ է նշել Խավիեր Բարդեմի հիասքանչ խաղը, որը մարմնավորեց ֆիլմաշարի ամենատպավորիչ չարագործներից մ