Ալանդյան կղզիները չափազանց հեռու են ՂարաբաղիցՏարածքային վեճերի կարգավորման «ալանդական մոդելը» Մինսկի խմբի քննարկման առարկա դարձնելու փորձերը ոչ մի իմաստ չունեն: Վերջին ժամանակներս Ադրբեջանում աճել է ղարաբաղյան հակամարտության լուծմանն ուղղված բոլոր տեսակի մասնավոր եւ հասարակական նախաձեռնությունների հանդեպ հետաքրքրությունը: Ինչպես երեւում է, Ադրբեջանի ոչպետական կազմակերպությունների ղեկավարները բառացիորեն են ընդունել միջազգային հաշտարարների հայտարարություններն այն մասին, որ ղարաբաղյան հիմնախնդրի լուծումը հակամարտող երկրների մայրաքաղաքներում պետք է գտնվի: Բաքվի հասարակական գործիչները գործի են անցել մշակելու եւ իրենց հանրության քննարկմանը ներկայացնելու ոչ մեկի հետ չհամաձայնեցված կարգավորման մեխանիզմներ: Պետական այրերը, որոնք ի պաշտոնե պետք է զբաղվեն ղարաբաղյան հիմնահարցով, տարակուսանքով են հետեւում նման տարօրինակ գործընթացին, սակայն նախընտրում են չմիջամտել: Մինչդեռ տեղերում նախաձեռնությունն առավել ակտիվանում է: 28 հունվարի 2002 PanARMENIAN.Net - «Խաղաղության եւ ժողովրդավարության ինստիտուտ» հասարակական կազմակերպության ղեկավար Լեյլա Յունիսովան Հեյդար Ալիեւին Ղարաբաղի հարցով բանակցություններ վարելու մենաշնորհից զրկելու իր ձգտումներում խիստ հաստատակամ է: Նա մշակել է իր «հայ-ադրբեջանական հակամարտության կարգավորման պլանը», որը, նրա խոսքերով, «հաշվի է առնելու նաեւ Հայաստանի շահը» (սրա երաշխիքը երեւի թե այն պետք է լինի, որ «պլանը» ներկայացվել է հայկական ինչ-որ ոչպետական կազմակերպության քննարկմանը): Ղարաբաղյան հիմնահարցի լուծման այլընտրանքային նախագիծ են մշակել նաեւ նախագահի նախկին խորհրդական Էլդար Նամազովը եւ արտաքին գործերի նախկին նախարար Թոֆիկ Զուլգարովը: Այս երկու գործիչներն էլ այսօր չեն ներկայացնում ո'չ պետական որեւէ մարմին, ո'չ էլ քաղաքական կուսակցություններ: Ի տարբերություն Յունիսովայի նախապատրաստած տարբերակի, «Նամազով-Զուլֆիգարովի խարտիան» հակամարտության ռազմական ճանապարհով լուծման շեշտադրումներ է առաջադրում: Իսկ ահա հայտնի իրավապաշտպան, Հելսինկյան քաղաքացիական ասամբլեայի ադրբեջանական ազգային խորհրդի նախագահ Արզու Աբդուլաեւան ռազմական ճանապարհը չի որդեգրել: Նա շարունակում է փնտրել այնպիսի տարբերակ, որն ամբողջությամբ կբավարարի ադրբեջանցիներին, միեւնույն ժամանակ այրունահեղության հեռանկար չի ունենա: Նման տարբերակ գտնելու փորձերը նրան հանգեցնում են այսպես կոչված «ալանդական մոդելին»: Վերջերս իր ելույթում Աբդուլովան կոչ է արել վերսկսել Շվեդիայի եւ Ֆինլանդիայի միջեւ տարածքային վեճի լուծման փորձը ղարաբաղյան հակամարտության կարգավորման ընթացքում օգտագործելու հնարավորության քննարկումը: Խոսքն այն սխեմայի մասին է, որը հնարավորություն տվեց լուծել 8000 մանր կղզիներից բաղկացած արշիպելագի տիրապետման իրավունքի շուրջ ծագած հակամարտությունը: Հիշեցնենք, որ «ալանդական» տիպի ինքնավարության մոդելը մեկ անգամ չէ, որ մերժվել է ինչպես Ստեփանակերտի, այպես էլ Երեւանի կողմից: Ղարաբաղյան հակամարտության կարգավորման դեպքում այս սխեմայի կիրառման փորձի անհեռանկարային լինելու մասին օրերս հայտարարել է նաեւ ԵԱՀԿ Մինսկի խմբի ռուս համանախագահ Նիկոլայ Գրիբկովը: Նա նշել է, որ չնայած 90-ականների կեսերին շվեդ-ֆիննական հակամարտության լուծման փորձի կիրառման գաղափարը քննարկվել է, սակայն այն հետագա զարգացում չի ստացել: Ներկայումս միջնորդներն առավել լուրջ խնդիրներ ունեն, որպեսզի շեղվեն` քննարկելու ղարաբաղյան հակամարտության երեք կողմերից արդեն իսկ երկուսի կողմից սկզբնապես մերժված տարբերակները: Բայց սա Արզու Աբդուլաեւին չի հուզում: Իր գաղափարի նկատմամբ Հայասատանի եւ ԼՂՀ-ի վերաբերմունքը նրան այնքան էլ չի հետաքրքրում: Ավելի շատ նա ձգտում է համոզել իր հայրենակիցներին «ալանդական մոդելի» օգտակարությունը: Իրավապաշտպանը խիստ զարմացած է, որ Բաքվում հաճախ բացասական են արտահայտվում «ալանդական մոդելի» վերաբերյալ: Նրա կարծիքով այս մոդելը չափազանց ընդունելի է Ադրբեջանի համար, քանի որ առաջարկված սխեմայի հիման վրա կնքված խաղաղության համաձայնագիրը թույլ կտա Ղարաբաղն Ադրբեջանի անբաժանելի մասը դարձնել եւ դրանով իսկ զինաթափել այն: Հիշեցնենք, որ իրենց ազգային առանձնահատկությունների պահպանմամբ շահագրգիռ Ալանդյան արշիպելագի շվեդախոս բնակիչները լրիվ բավարարվում են ինքնակառավարմամբ, որը նրանց հնարավորություն է տալիս ինքնուրույն վարել գործերը այնպիսի ոլորտներում, ինչպիսիք են կրթությունը, մշակույթը, առողջապահությունը, տրանսպորտը, կոմունալ տնտեսությունը: Միեւնույն ժամանակ, նրանք ընդունում են պաշտոնական Հելսինկիի ֆիննական միասնական պետության ներքին քաղաքականություն վարելու, երկրի պաշտպանության հարցերով զբաղվելու, դատական համակարգը վերահսկելու, քրեական գործերի հետաքննություններ վարելու առանձնաշնորհը: Ալանդացիները չեն խորշոմ ֆիննական միասնական տարադրամից եւ դեմ չեն ընդհանուր մաքսային եւ հարկային համակարգին: Աբդուլաեւի կարծիքով «Ադրբեջանը, հիմք ընդունելով ալանդական մոդելը, Ղարաբաղում կիրառելու համար նրանում որոշ փոփոխություններ մտցնելով, կարող է ստեղծել միջազգային չափանիշներին համապատասխան փաստաթուղթ եւ դրանով խթանել խաղաղ կարգավորման գործընթացը: ՀՔԱ ադրբեջանական խորհրդի ղեկավարը հայրենակիցների ուշադրությունն է հրավիրում այն փաստին, որ Ալանդյան կղզիների այսօրվա կարգավիճակը ոչնչով բարձր չէ մինչեւ 1988 թ.-ը Ղարաբաղյան ինքնակառավարվող շրջանի ունեցած կարգավիճակից: Տարբերությունը միայն այն է, որ «այն մոդելը խորհրդային ինքնակառավարում էր, մինչդեռ ալանդականը եվրոպական է»: Աբդուլաեւան հավաստիացնում է, որ եթե Ադրբեջանը համաձայնի հիմնախնդիրը լուծել ալանդական մոդելի հիման վրա, Ղարաբաղի չի ունենա ավելի շատ իրավունքներ, որքան այսօր ունի Նախիջեւանը` Ադրբեջանի սահմանադրության համաձայն: Այս դեպքում, անհասկանալի է, թե ինչի՞ց ելնելով Հայսատանը կքննարկի նման սխեման: Ու՞ր մնաց ապա փոխզիջումը, եթե արդյունքում Ղարաբաղը կստանա այն, ինչ ուներ մինչեւ 88 թ.-ը: Պատմության տեսանկյունից ալանդացիների եւ ղարաբաղցիների միջեւ որոշ ընդանրություններ իրոք կան: Արշիպելագի կղզիները ֆիննական անկախ պետության կազմում երբեք չեն եղել, ինչպես եւ Ղարաբաղը անկախ Ադրբեջանի մասը երբեք էլ չի կազմել: Սակայն շվեդախոս ալանդացիները չունեին Ֆինլանդիայի կազմից դուրս գալու որոշման խնդրի լուծման սահմանադրական մեխանիզմներ: Իսկ Ղարաբաղը լքեց Ադրբեջանի սահմանը դեռեւս այն ժամանակվա միասնական Խորհրդային Միության բոլոր օրենքների համաձայն եւ ԽՍՀՄ-ի փլուզումից հետո ունի բոլոր իրավական հիմքերն իրեն համարելու միջազգային իրավունքի այնպիսի սուբյեկտ, ինչպիսին Ադրբեջանն է: Պետք է հաշվի առնել նաեւ այն հանգամանքը, որ Ֆիննական միասնական պետության մեջ Ալանյան կղզիների շվեդախոս բնակչությանը ֆիզիկական բնաջնջում չէր սպառնում, որին սակայն ենթարկվեցին հայերը, ինչպես օրինակ ադրբեջանական Սումգայիթ քաղաքում: Շվեդախոս բնակչությանը պատերազմի մեջ չներքաշեցին: Իսկ ղարաբաղցիները, ենթարկվելով ագրեսիայի, ստիպված եղան միջոցներ ձեռնարկել իրենց անվտանգության պահպանման համար: Ազգային-ազատագրական պատերազմում նրանց փաստացի հաղթանակը չի կարող հաշվի չառնվել բանակցությունների ընթացքում: Ինչպե՞ս կարելի է համեմատել քաղաքակիրթ Ֆինլանդիան տոտալիտար Ադրբեջանի հետ, որտեղ, դատելով քաղբանտարկյալների հսկայական քանակից, պաշտպանված չեն նույնիսկ սեփական ազգի ներկայացուցիչների քաղաքացիական իրավունքները: Ֆինլանդիայում այսօր խաղաղ ապրում են միլիոնավոր շվեդախոս քաղաքացիներ, որոնք ունեն անհրաժեշտ բոլոր պայմանները իրենց անկախ երկրի բնակիչներ զգալու համար: Այ եթե Ադրբեջանում էլ հայերենը երկրորդ պետական լեզու լիներ, ինչպես Ֆինլանդիայում երկրորդ պետական լեզուն շվեդերենն է, եթե Բաքվում էլ հայերը բարգավաճեին, ինչպես շվեդացիները` Հելսինկիում կամ Տամպերայում, ապա այդ դեպքում գուցե արժեր լրջորեն քննարկել ղարաբաղյան հակամարտության կարգավորման հարցում ալանդական մոդելի կիրառման հնարավուրությունը: Առայժմ մենք գործ ունենք ակնհայտ այն փաստի հետ, որ կռվի դաշտում անկախ ապրելու իր իրավունքը պաշտպանած Ղարաբաղի բնակչոթյունը ինքնուրույն կորոշի հարեւան Ադրբեջանի եւ Հայաստանի հետ հարաբերության ձեւերը: Եթե պաշտոնական Ստեփանակերտը համաձայն է քննարկել միջազգային միջնորդների առաջարկած այսպես կոչված «ընդհանուր պետության» սկզբունքները, սա դեռեւս չի նշանակում, որ նա պատրաստ է լսելու Ադրբեջանին ենթարվելու մասին առաջարկները: Ամենաընթերցվողը բաժնում ՀՀԿ-ն «աղքատացել է», ՔՊ-ն՝ «հարստացել» Հայաստանի բազմաթիվ կառույցներ մնացել են առանց ղեկավարի Ով ինչպիսի աղմուկով հեռացավ և ինչու Հայաստանը նոյեմբերի 10-ից հետո՝ թվերով Բաժնի այլ նյութերը «Խաղի» մեջ վերադառնալու ցանկությամբ ՌԴ-ն փորձում է չմարգինալացվել ՀՀ-Ադրբեջան բանակցային գործընթացում Դրագոմանների ժամանակը Դեպի արդիականացված արտաքին քաղաքականություն Բարձր պաշտոնից՝ մեղավորի աթոռին 2018-ի «մեղադրյալները» | Զախարովա․ ՀՀ-ն շարունակում է ՀԱՊԿ լիարժեք անդամ մնալ իր համապատասխան պարտավորություններով Նա նաև ասել է, որ ՌԴ–ն կասկածի տակ չի դնում իր արտաքին քաղաքական կուրսն ընտրելու ՀՀ սուվերեն իրավունքը Կուպմանը Բաքվում ասել է, որ Եվրահանձնաժողովը ողջունում է ՀՀ-ի և Ադրբեջանի միջև վերջին պայմանավորվածությունները Նա ասել է, որ Եվրահանձնաժողովում դրական են գնահատում Հարավային Կովկասում վերջին իրադարձությունները ԱՄՆ–ն պատժամիջոցներ է սահմանել որոշ թուրքական և ադրբեջանական ընկերությունների դեմ՝ ՌԴ–ին աջակցելու համար Պատժամիջոցներն առնչվում են այն ընկերություններին և ֆիզիկական անձանց, որոնք օգնում են Մոսկվային ռազմական բաղադրիչներ ստանալ Էրդողան․ Թուրքիան որոշել է խզել առևտրային կապերն Իսրայելի հետ Առևտրաշրջանառությունը երկրների միջև հասնում է 9․5 մլրդ դոլարի |