«Խավարամտությունը գլուխ է բարձրացնում, անկեղծ պիտի խոստովանեմ»

«Խավարամտությունը գլուխ է բարձրացնում, անկեղծ պիտի խոստովանեմ»

Տիկնիկայինի տնօրենը՝ թատրոնում ռոք-համերգի չեղարկման մասին

Տիկնիկային թատրոնը չեղարկել է լեհական Vader խմբի՝ հոկտեմբերի 4-ին կայանալիք համերգին բեմ տրամադրելու որոշումը։ Ամեն ինչ սկսվեց ԱՄՆ-աբնակ մի ֆբ-օգտատիրոջ դժգոհությունից առ այն, որ «սատանիստական Վադեր լեհական խումբը համերգ է տալու Երևանում: Այն էլ ուր՝ Տիկնիկային Թատրոնում» ու դրան հետևած սոցցանցային ալիքից։ Համերգի կազմակերպիչ Zhesht Events-ն ի պատասխան մեջբերել է երաժիշտների խոսքերը․ «Սատանիզմը մեզ համար զուտ ըմբոստության սիմվոլիզմ է և չի խորհրդանշում սեր չարիքի նկատմամբ։ Մենք օգտագործում ենք այդ սիմվոլիկան, որպեսզի մեր ըմբոստությունն արտահայտենք ընդդեմ այն ամեն վատի, ինչը կատարվում է աշխարհում՝ քաղաքական որոշումներ, դաժանություն, պատերազմներ և այլն»։ Համերգն, այնուամենայնիվ, կկայանա, սակայն դրա տեղը դեռ չի նշվում։

PanARMENIAN.Net - Տիկնիկայինում համերգի չեղարկման մասին PanARMENIAN.Net ը խոսել է արվեստի վաստակավոր գործիչ, թատրոնի գեղարվեստական ղեկավար Ռուբեն Բաբայանի հետ։

Տիկնիկայինը և ռոքը

Թատրոնը միշտ աջակցել է ռոք համերգներին, և՛ հայկական, և՛ արտերկրի խմբերին։ Բայց այս տարիների ընթացքում, երբ ես եմ ղեկավարում թատրոնը, կտրականապես արգելված է որևէ քարոզչություն՝ լինի դա կուսակցական, թե կրոնական: Ցավոք սրտի, այս ռոք խումբն ունի բացահայտ սատանիստական քարոզչության ուղղվածություն, որի մասին իր հարցազրույցներում բազմիցս ասել է խմբի ղեկավարը: Եվ այստեղ իրար բախվեցին երկու սկզբունք: Մեկը՝ տալ հնարավորություն, որ ռոքը զարգանա Հայաստանում, որպեսզի նոր խմբեր երևան, և երկրորդը՝ խախտել թատրոնի կողմից ընդունված սկզբունքը: Ես գերադասեցի այդ սկզբունքը չխախտել. այստեղ, երևի իմ մեղքն է, որ նախօրոք չեմ ծանոթացել՝ ինչ խումբ է: Ես ինքս էլ ծանր մետալի սիրահար չեմ, այդքան էլ տեղյակ չեմ խմբերից:

Ռոքը, արվեստը և սատանան

Ես բացարձակապես չեմ բացառում, որ սատանիզմը որպես ըմբոստության սիմվոլ է օգտագործվում՝ ընդդեմ ամեն վատի: Բոլոր դեպքերում, այդտեղ կա որոշակի քարոզչություն՝ էլի կրոնական. աստված է, սատանա է՝ իրականում ի՞նչ տարբերություն, քարոզչությունը մնում է քարոզչություն: Բացարձակապես չեմ բացառում նման արվեստի առկայությունը. այն ունի բազմադարյա պատմություն և՛ գեղարվեստի մեջ, և՛ գրականության մեջ, եթե մենք նայեք Գյոթեի «Ֆաուստը», Բուլգակովի «Վարպետն ու Մարգարիտան» և շատ այլ գործեր: Այս ձևը՝ ես նկատի ունեմ «դիվային մոտեցումը», արվեստի ասպարեզում եղել է մշտապես, և դա չի բացառել արվեստի մեծ գործեր ստեղծելը:

Սատանան և մենք

Ես շատ քիչ բան գիտեմ սատանիզմի մասին, բայց կարծում եմ կա ևս մի շատ կարևոր բան. մեր հասարակության մեջ, ցավոք սրտի, տարօրինակ պատկերացումներ կան ամեն ինչի մասին: Ես կարծում եմ, որ այսօր լուսավորության և կրթության մեջ մենք մեծ պրոբլեմ ունենք: Այն ինչ ասում եք, ոչ թե պետք է մակերեսային մակարդակով մատուցվի, այլ խորանալ, որպեսզի հասկանալ, որ արվեստը շատ ավելի լայն և շատ ավելի բազմագույն երևույթ է, քան պարզունակ ճշմարտությունները։ Ու սա պետք է սկսվի դպրոցից: Եթե չլիներ հանրության մշակութային կրթության այդ պրոբլեմը, համերգի՝ Տիկնիկայինում չեղարկում չէր լինի. Գիտե՞ք՝ ինչ խոսակցություններ են․ «Ինչպե՞ս կարող է մի տեղ նման համերգ լինել, որտեղ գալիս են մեր երեխաները»: Բայց համերգը տեղի էր ունենալու երեկոյան, ի՞նչ կապ ունի երեխաների այստեղ գալը, որոնք, պարզ է, էդ համերգին չեն գալու: Մի խոսքով՝ դեմագոգիայի բազմաթիվ շերտեր կային, բայց ես ասեմ, բազմաթիվ ծանր մետալի խմբեր, հիմնականում հենց այդ ուղղությունն ունեն, որքանով ես եմ տեղյակ, մեկը մի քիչ ավել, մեկը մի քիչ պակաս:

Թատրոնը հարվածի տակ չդնել

Խմբին ես ծանոթ չեմ, բայց թատրոնը հարվածի տակ դնել չեմ կարող: Որովհետև, բոլոր դեպքերում, թատրոնն ունի իր խաղացանկը, տարեկան գրեթե 70 000 հանդիսատես: Ես կարծում եմ, որ մեծ պրոբլեմ ունենք հանրության կրթության հետ: Այս խումբը, երևի, մի քիչ չափից ավելի վառ արտահայտված էր մեր հասարակության համար: Ես պարզապես որպես թատրոնի տնօրեն ունեի մի մտավախություն. սա կարող էր դառնալ նախադեպ, որ քարոզչական տարբեր խնդիրներով տառապող խմբեր փորձեին օգտագործել այս թատրոնի բեմը: Սահմանափակումը սա էր, կազմակերպիչների հետ կապված որևէ կոնֆլիկտ և խնդիր չի եղել, առաջին դեպքը չէ, որ նրանք ռոք համերգ են կազմակերպում:

Անկեղծ ասած, ես որոշակի ուղղվածություն, ուղղորդում եմ տեսնում այս ամենի մեջ: Երկու շաբաթ առաջ Կոնսերվատորիայի միջոցառումը, որը մեծ աղմուկ հանեց (Կոնսերվատորիայում անցկացվող ուսանողական միջոցառումը դադարեցվել էր «ստանիստական» լինելու կասկածների պատճառով-խմբ.): Մենք հիմա ապրում ենք մի ժամանակաշրջանում, երբ խավարամտությունը գլուխ է բարձրացնում, պիտի անկեղծ դա խոստովանեմ:

Vader խումբը համարվում է Լեհական դեթ մետալի վետերաններից: Խումբը Երևանում պատրաստվում է ներկայացնել գործեր նոր լույս տեսած Thy Messenger EP ալբոմից և հիթեր խմբի 35-ամյա պատմությունից։ Vader-ը ստեղծվել է 1983 թվականին՝ անունը վերցնելով «Աստղային պատերազմներ» ֆիլմի գլխավոր կերպարներից մեկից։ Երգերի թեմատիկան հիմնականում 2-րդ համաշխարհային պատերազմն է, սարսափ ֆիլմերը և հանրահայտ գրող Հովարդ Լավքրաֆթի ստեղծագործությունները։

PanARMENIAN.Net / Անահիտ Հակոբյան
 Ամենաընթերցվողը բաժնում
10 պատճառ՝ DZEN-ին ներկա գտնվելու
ԽՍՀՄ ինտերակտիվ թանգարանը հրդեհից հետո տանիք է փնտրում
Sigma Sol խումբը՝ նոր խոսք հայկական երաժշտության մեջ
Երևանում կկայանա Իվան Դորնի համերգը՝ նոր ձևաչափով
 Ուշադրության կենտրոնում
Հայազգի Սթիվեն Զաիլյանը՝ «Ոսկե գլոբուսի» հավակնորդ

Հայազգի Սթիվեն Զաիլյանը՝ «Ոսկե գլոբուսի» հավակնորդ Նա առաջադրվել է «Իռլանդացին» ֆիլմի համար

 Բաժնի այլ նյութերը
Տաթևից՝ Դրեզդեն 4 կոթող, որ վերականգնվեցին մոխրից
Deutschland, Deutschland über allen Ինչ է ասում Rammstein-ն իր նոր հոլովակում
Ռենեսանսի «վերածնունդը» Երևանում Նկարչուհին կտավների հերոսներին տեղափոխում է գրասենյակ, բար ու լողափ