ՄԻԱՎ-ով մարդկանց հանդեպ խտրական վերաբերմունք կա

ՄԻԱՎ-ով մարդկանց հանդեպ խտրական վերաբերմունք կա

Պետք չէ վախենալ, պետք է իմանալ

ՄԻԱՎ-ով ապրող մարդը կարող է խնամել հարբուխով հիվանդ ընկերոջը, ձեռքով բարևել ծանոթներին, համբուրել, համբուրվել, առողջ երեխաներ ունենալ:

PanARMENIAN.Net - NO AIDS սոցիալական հարթակի հոլովակները հենց այս մասին են՝ պարզ տեքստով և առօրյա մոտեցմամբ:

ՄԻԱՎ-ի մասին կարծրատիպային մոտեցումների և վարակը կրող մարդկանց հանդեպ խտրական վերաբերմունքի մասին PanARMENIAN.Net ը զրուցել է NO AIDS նախաձեռնության և «Եղիր տեղեկացված» ՀԿ-ի ղեկավար Արուսիկ Մկրտչյանի և ՄԱԿ-ի ՄԻԱՎ/ՁԻԱՀ-ի միացյալ ծրագրի հայաստանյան գրասենյակի ներկայացուցիչ Ռոզա Բաբայանի հետ:

«Կան խարանի և խտրականության դրսևորման որոշ դեպքեր, և ցավոք սրտի, թե, օրինակ, բժշկական հաստատություններում՝ ծառայություններ ստանալու համար դիմելիս և թե, առհասարակ, առօրյա կյանքում: Սա է պատճառը, որ ՄԱԿ-ի ՄԻԱՎ/ՁԻԱՀ-ի միացյալ ծրագրի աջակցությամբ իրականացվում են աշխատանքներ՝ թե՛ բուժաշխատողների գիտելիքների բարձրացման, և թե՛ հանդուրժող հասարակության ձևավորման ուղղությամբ»,- ասում է Ռոզա Բաբայանը:

Բաբայանը հիշեցնում է՝ ՄԻԱՎ-ը չի փոխանցվում ձեռքով բարևելու, գրկախառնվելու, համբուրվելու, ընկերական համբույրների, սպորտային մարզումների ժամանակ, օդի, ջրի, սննդամթերքի և կենցաղային առարկաների միջոցով: Ընդհանուր սպասքից, անկողնային պարագաներից, հագուստից, սանհանգույցից օգտվելիս ևս վարակակիր դառնալ հնարավոր չէ:

Այն, ինչ ասում է Ռոզա Բաբայանը, ցույց է տալիս «Եղիր տեղեկացված» ՀԿ-ի NO AIDS սոցիալական հարթակը. կարճ հոլովակներ՝ կենցաղային իրավիճակներով և ՄԻԱՎ-ի մասին տեղեկատվությամբ:

«Ծրագիը հանրային իրազեկման նպատակ ունի՝ ներկայացնելու այն բոլոր միջոցառումները և սոցիալական նախաձեռնությունները, որոնք առընչվում են ՄԻԱՎ/ՁԻԱՀ թեմային, կարող են ինչ-որ կերպ դրական ազդել ՄԻԱՎ դրական մարդկանց կյանքի որակի վրա և նաև լինել ինֆորմատիվ ՀՀ բնակչության համար»,- ասում է հարթակի հիմնադիր Արուսիկ Մկրտչյանը՝ հավելելով, որ հոլովակների վերջում միշտ նշվում են կոնտակտային տվյալներ, որոնցով հնարավոր է կապվել ՁԻԱՀ-ի կանխարգելման հանրապետական կենտրոնի հետ, իմանալ մանրամասները և ցանկության դեպքում անցնել անվճար և անանուն թեստավորում:

Արուսիկ Մկրտչյանը նշում է՝ իրականացված տեղեկատվական արշավներն իրենց արդյունքն ունեցել են. բարձրացել է մարդկանց տեղեկատվածության աստիճանը:

«Հիմա մարդիկ ավելի լավ են հասկանում այս խնդիրը, ավելի տեղեկացված են և ավելի շատերը գիտեն իրենց ՄԻԱՎ կարգավիճակի մասին: Նաև մարդկանց վերաբերմունքն է փոխվում ՄԻԱՎ դրական մարդկանց հանդեպ, քանի որ բոլոր միֆերը, որ վերաբերում են վարակի փոխանցման ուղիներին, կոտրվում են հանրային իրազեկման միջոցառումերի միջոցով»,- ասում է Մկրտչյանն ու հավելում,- չնայած դրան՝ դեռ կան մարդիկ, ովքեր բավարար չափով ինֆորմացված չեն և ունեն ձևավորված կարծրատիպեր այս խնդրի շուրջ»:

1988-ից մինչև 2019-ի դեկտեմբերի 1-ը ՀՀ-ում գրանցվել է ՄԻԱՎ վարակի 3730 դեպք ՀՀ քաղաքացիների շրջանում, որոնցից 395-ը` 2018-ին ընթացքում: ՄԻԱՎ վարակի արձանագրված դեպքերի ընդհանուր կառուցվածքում գերակշռում են արական սեռի ներկայացուցիչները: Հանրապետությունում ՄԻԱՎ վարակի փոխանցման հիմնական ուղին հետերոսեքսուալ ճանապարհն է (մոտավորապես 72%): Հիմնական ռիսկային խումբն են աշխատանքային միգրանտները և վերջիններիս ընտանիքների անդամները: ՄԻԱՎ/ՁԻԱՀ-ի իրավիճակի գնահատումը վկայում է, որ հանրապետությունում ՄԻԱՎ-ով ապրող մարդկանց հաշվարկային թիվը կազմում է 3500, որոնցից 2018-ի դեկտեմբերի 31-ի դրությամբ 74%-ը (2589) գիտեր իր կարգավիճակի մասին, նրանցից ՀՌՎ բուժում ստանում էր 72%-ը (1871), չհայտնաբերվող վիրուսային ծանրաբեռնվածություն էլ ուներ 86%-ը (1585): ՄԻԱՎ-ի տարածվածությունը 15-49 տարիքային խմբում 0,2% է:

Հոլովակները նկարահանել են «Արաբկիր» ԲՀ-ի «Երեխաների և դեռահասների առողջության ինստիտուտը» և Status Digital-ը՝ ՄԱԿ-ի ՄԻԱՎ/ՁԻԱՀ-ի միացյալ ծրագրի և ՅՈՒՆԵՍԿՕ-ի աջակցությամբ:

Անահիտ Հակոբյան / PanARMENIAN.Net
 Ամենաընթերցվողը բաժնում
Ինչպես Վայոց ձորի լեռներում ծնվեց շան և կատվի ընկերությունը
Փրկել մոլորակը՝ փոխարինելով «անփոխարինելին»
Կինն ահազանգում է՝ «Արմավիր» ՔԿՀ կալանավորի առողջական վիճակը ծանրանում է
 Ուշադրության կենտրոնում
«Էրեբունի պլազայում» կրակոցներ են հնչել

«Էրեբունի պլազայում» կրակոցներ են հնչել «Այս պահին դեպքի վայրում օպերատիվ խմբերն են աշխատում», - ասացին ոստիկանությունից։

 Բաժնի այլ նյութերը
Ձայնազրկության 40 օրը Քթի միջնապատի վիրահատությունից հետո վնասվել են երիտասարդի ձայնալարերը
Սատանա կա քաղաքում Վհուկաորսը միջնադարյան Եվրոպայից մինչև մերօրյա Հայաստան
Կարմիր բլրի վերականգնումից մինչև Սքեյթ այգի Ինչ են ուզում երևանցիները «Ակտիվ քաղաքացի» հարթակից