  Կինոաֆիշ. 5 ֆիլմ, որոնք կարելի է դիտել սեպտեմբերինԱշնան սկզբին խոշոր ստուդիաները «դադար են» վերցնում` պատրաստվելով «հսկաների մարտին», որը սկսվում է հոկտեմբերի կեսին Ամառային կինոշրջանը մոտենում է ավարտին: Մեծ ստուդիաներն արդեն հասցրել են ներկայացնել իրենց գլխավոր հիթերը` ոմանք շարունակում են միլիոնավոր դոլարներ հավաքել, մյուսները հաշվում են վնասներն ու չմխիթարող եզրահանգումներ անում: Աշնան սկզբին խոշոր ստուդիաները «դադար են» վերցնում` պատրաստվելով «հսկաների մարտին», որը սկսվում է հոկտեմբերի կեսին: Ուստի, սեպտեմբերը լավ ամիս է համարվում ավելի փոքր ընկերությունների համար` առաջիկա օրերին մեծ էկրաններին կարելի է տեսնել թեև ոչ մեծ բյուջեով, բայց շատ հետաքրքիր կինոնկարներ:  31 օգոստոսի 2015PanARMENIAN.Net - Ծանոթանալով ժամանակացույցին` PanARMENIAN.Net ը ներկայացնում է 5 նորույթ, որոնք կարելի է դիտել սեպտեմբերին Երևանի կինոթատրոններում: «Փոխադրողը. Ժառանգություն» (օրիգ. անվանումը The Transporter Refueled) Սուր սյուժեով մարտաֆիլմ, Ֆրանսիա, 2015 թ. Ռեժիսոր` Կամիլ Դելամար Դերերում` Էդ Սքրեյն, Լոան Չաբանոլ, Ռեյ Սթիվենսոն, Լեն Կուդրյավիցկի Պրեմիերան Երևանում սեպտեմբերի 10-ին Շատերին է ծանոթ «Փոխադրողը» եռապատումը, որտեղ անվրդով վարորդ Ֆրենկ Մարտինը, բրիտանացի դերասան Ջեյսոն Սթեթհեմի կատարմամբ, կյանքեր է փրկում և պայքարում է կազմակերպված հանցավորության դեմ: Այս ֆիլմաշարի շնորհիվ է, որ ձևավորվել է Սթեթհեմի` մարտաֆիլմերի մռայլ և դաժան հերոսի կերպարը, որը ֆիլմից ֆիլմ է անցնում, արտաքնապես բոլորովին չփոխվելով: «Ժառանգությունը» Լյուկ Բեսոնի պրոդյուսերական նախագիծն է: Այս անգամ հմուտ «վարորդի» դերում երիտասարդ Էդ Սքրեյնն է: Կինոֆիլմը, թեև ներկայացվում է որպես հայտնի եռապատման նախապատմություն, ըստ էության, նրա վերաթողարկումն է: Նոր «Փոխադրողի» սյուժեն բարդ չէ. Ֆրենկ Մարտինը ստիպված է մարտահրավեր նետել ռուսական հանցավոր սինդիկատին` կատարելու համար իր հորն առևանգած մարդկանց պահանջները: Թեև նման կինոնկարների դեպքում սյուժեն ամենևին էլ գլխավոր բաղադրիչը չէ: «Ռիկին և Ֆլեշը» (օրիգ. անվանումը Ricki and the Flash) Երաժշտական դրամա, ԱՄՆ, 2015 թ. Ռեժիսոր` Ջոնաթան Դեմմե Դերերում` Մերիլ Սթրիփ, Ռի Սփրինգֆիլդ, Ռիկ Ռոսաս, Ջո Վիտալե Պրեմիերան Երևանում սեպտեմբերի 10-ին Արտառոց ստեղծագործող անձի պատմություն է, որն անսպասելիորեն վերադառնում է տուն` նախկին ամուսնու մոտ, նրանից և երեխաներից հեռու շատ տարիներ անց: Կինոքննադատները միանշանակ չընդունեցին Սթրիփ-Դեմմե նոր ստեղծագործական տանդեմը, և դա հասկանալի է: Նորաոճ ռեժիսոր Ջոնաթան Դեմմեն` աղմկահարույց «Գառների լռությունը» ֆիլմի հեղինակն է, որը հանդես է գալիս իր համար անսովոր ժանրում: Ինչպես նշում են քննադատները, հանճարեղ Մերիլ Սթրիփի համար խաղալու նյութ չկա` ռեժիսորը նրա առջև չի դնում գերբարդ դերասանական խնդիրներ, որոնց կատարման գործում օսկարակիր դերասանուհին իսկական վարպետ է: Արդյունքում ստացվել է թեթև մի ֆիլմ, որը դուր կգա երաժշտական պատմությունների սիրահարներին, որտեղ նաև կատակերգության երանգներ կան: «Լաբիրինթոսում վազողը. Կրակի փորձությունը» (օրիգ. անվանումը Maze Runner: The Scorch Trials) Ֆանտաստիկա, ԱՄՆ, 2015 թ. Ռեժիսոր` Ուես Բոլլ Դերերում` Դիլան Օ’ Բրայան, Կայա Սկոդելարիո, Թոմաս Սենգսթեր, Նատալի Էմանուել, Էյդան Գիլլեն Պրեմիերան Երևանում սեպտեմբերի 17-ին Նախորդ տարվա «Լաբիրինթոսում վազողը» կինոհիթի շարունակությունն է, որը բավականին բարձր գնահատվեց ինչպես քննադատների, այնպես էլ հանդիսատեսի կողմից: Սա հակաուտոպիա է, որը նկարագրում է մի խումբ դեռահասների դաժան առօրյան, որոնք «մեծահասակների» էքսպերիմենտների օբյեկտներն են դարձել: Այս անգամ լաբիրինթոսի փակ տարածքի փոխարեն քաղաքի ավերակներ են ու անապատ: Լաբիրինթոսն անցած է, սակայն Թոմասը, Թերեզը, Մինխոն և մյուսները չեն կարող հանգիստ շունչ քաշել: Գաղտնի կազմակերպության խորհրդավոր ղեկավարությունը, որը կազմակերպել էր կյանքի ու մահու այդ մրցավազքը, նոր, մահացու վտանգավոր փորձություններ է սահմանում դեռահասների համար: Այս անգամ նրանք պետք է հատեն շիկացած անապատն ու հանդիպեն անբուժելի հիվանդների հետ, որոնք աչքի են ընկնում բուռն խառնվածքով և անկանխատեսելի վարքով: «Էվերերստ» (օրիգ. անվանումը Everest) Արկածային թրիլեր, ԱՄՆ, Մեծ Բրիտանիա, Իսլանդիա, 2015 թ. Ռեժիսոր` Բալտասար Կորմակուր Դերերում` Ջեյսոն Քլարկ, Ջոշ Բրոլին, Ջոն Հոուկե, Ռոբին Ռայթ, Էմիլի Ուոթսոն, Կիրա Նայթլի, Սեմ Ուորթինգտոն, Ջեյք Ջիլենհոլ Պրեմիերան Երևանում սեպտեմբերի 24-ին Սեպտեմբերի գլխավոր պրեմիերան է: Հոլիվուդյան մի ամբողջ «աստղաբույլ» կպատմի մեծ և անհասանելի Էվերեստը նվաճած լեռնագնացների քաջության և դիմացկունության մասին ամենազարմանալի պատմություններից մեկը: Սակայն ամենադաժան փորձությունները սպասում են նրանց ոչ թե վերելքի ժամանակ, այլ «աշխարհի գագաթից» իջնելիս: Ֆիլմի հիմքում իրական դեպքեր են, որ տեղի են ունեցել Հիմալայներում 1996-ի մայիսին: Այն ժամանակ միանգամից 3 կոմերցիոն գիտարշավ, որոնց կազմում էին ինչպես փորձառու ալպինիստներ, այնպես ել զբոսաշրջիկներ, որոնք չունեին 8 հազար մ բարձրություն ունեցող լեռը մագլցելու փորձ, բարձրացան աշխարհի ամենաբարձր լեռան գագաթը: «Պրակտիկանտը» (օրիգ. անվանումը The Intern) Ռեժիսոր` Նենսի Մայերս Դերերում` Ռոբերտ դե Նիրո, Էնն Հաթաուեյ, Նատ Վուլֆ, Ռենե Ռուսո Պրեմիերան Երևանում սեպտեմբերի 24-ին Շատերին դուր չի գալիս, որ մեծ դերասան Ռոբերտ դե Նիրոն վերջին տարիներին հաճախ է նկարահանվում կատակերգական ֆիլմերում: Ինքը դերասանը վստահ է, որ դա լավագույն լուծումն է կինոյի վետերանի համար, որը թույլ է տալիս երիտասարդ սերնդին դրսևորել իրեն «լուրջ» կինոնկարներում` չհայտնվելով հսկաների ստվերում: Նոր ֆիլմը պատմում է 70-ամյա այրի Բեն Ուիթակերի մասին, որը հայտնաբերում է, որ թոշակի անցնելը դեռ աշխարհի վերջը չէ: Օգտվելով առիթից` նա ավագ ստաժոր է դառնում նորաձևության կայքում երիտասարդ Ջուլս Օսթինի ղեկավարությամբ, որին խաղում է «Ինտերսթելարի» աստղ Էնն Հաթաուեյը: Կարելի է ասել` ֆիլմը Դե Նիրոյի գաղափարների էկրանային մարմնացումն է: Արման Գասպարյան/ PanARMENIAN.Net  Ամենաընթերցվողը բաժնում Ի՞նչ է պլանավորում անել Netflix-ը՝ բաժանորդներին վերադարձնելու համար «Երեք շիշ գինի»՝ նոր ձևաչափ առանց սահմանների Վանդալիզմի զոհ դարձած արվեստի ամենահայտնի գործերը Dalma Garden Mall-ի ծրագրերն ու շոփինգի մշակույթը    Ուշադրության կենտրոնում Բաժնի այլ նյութերըՁև ու ծավալ ստացած Ազնավուրյան մեղեդին  Բացվել է քանդակագործ Մկրտիչ Մազմանյանի ինտերակտիվ ցուցահանդեսըԱրվեստի աշխարհում ամենաազդեցիկ հայկական ազգանունը Գագոսյանի ճանապարհը՝ հոլիվուդյան ֆիլմի մոտիվներովԴեգան, Սարյանն ու Ուրարտուն Մշակութային յուրացում՝ մեծերի թեթև ձեռքով |  Այլ հոդվածներ Վերջին լուրեր Կոլումբիան խզում է հարաբերություններն Իսրայելի հետ Գազայի հատվածի շրջափակումը այդ երկրի նախագահը «ցեղասպանություն» է անվանելՀՀ և Ուկրաինայի ԱԳ նախարարները հեռախոսազրույցում անդրադարձել են տարածաշրջանային հարցերի Միրզոյանն ընդգծել է սահմանազատման գործընթացում տարածքային ամբողջականության սկզբունքի անվերապահ հարգման կարևորությունըԳԹԿ. Դիմորդները դուրս կմնան մրցույթից, եթե չհայտագրվեն ու չընտրեն բուհ և մասնագիտություն Հունվար-փետրվարին քննություն հանձնած 8000–ից ավելի շրջանավարտներից 6000-ը դեռ հայտագրում չի կատարել |
