// IP Marketing video - START// IP Marketing video - END
Հայաստան-2047

Հայաստան-2047

ԱԺ-ն քննարկում է «Ճշտի մասին» օրենքը

Հունիսի 7-ին ԱԺ-ն քննարկել է «Կոռուպցիայի կանխարգելման հանձնաժողովի մասին» օրենքների փաթեթը:

PanARMENIAN.Net - Քննարկման ժամանակ ՀՅԴ խմբակցության անդամ Անդրանիկ Կարապետյանը կարծիք է հայտնել, որ նման փաթեթի ընդունումը «գործ տալու» ինստիտիուտի ներդրում է, ինչը հարիր չէ հայ ազգին:

PAN-ը պատկերացրել է՝ ինչպես կանցնեն ԱԺ նիստերը ոչ հեռավոր ապագայում, եթե խորհրդարանում շարունակեն տեղ տալ «ճշտին»:

6 հունիսի, 2047 թ., ԱԺ նիստ

ԽՈՍՆԱԿ. Հարգարժան պատգամավորներ, Ազգային ժողովի հերթական նստաշրջանում խմբակցությունների քննարկմանն է ներկայացվել կառավարության կողմից արդեն իսկ հաստատված «Ճշտի մասին» ՀՀ օրենքում լրացումներ և փոփոխություններ կատարելու մասին» ՀՀ օրենքի նախագիծը: Արձակուրդի ընթացքում այն հանրային լայն քննարկման առարկա էր դարձել: Ելույթի համար խոսքը տրվում է օրինագծի համահեղինակ, իշխող «Նոյյան տապան և Արարատ» խմբակցության անդամ Նահապետ Միքայելյանին:

ՆԱՀԱՊԵՏ ՄԻՔԱՅԵԼՅԱՆ. Հարգելի նախագահող, տիկնայք և պարոնայք, պատգամավորներ: «Ճշտի մասին» ՀՀ օրենքում լրացումներ և փոփոխություններ կատարելու» մասին ՀՀ օրենքի նախագիծն, ինչպես գիտեք, սահմանում է մի շարք օրենսդրական նոր մոտեցումներ, որոնց հիմքում ընկած է «Երկու ճշտերի մասին» հայեցակարգը: Երկարատև քննարկումների արդյունքում մենք հասկացանք, որ «Մեկ ճիշտ-մեկ ազգ» հայեցակարգն այլևս իրեն չի արդարացնում արդի ժամանակահատվածում, քանզի կոնֆլիկտներ են առաջանում վերջերս ընդունված մի շարք օրենքների և ենթաօրենսդրական ակտերի հետ: Օրինակ, մայիսի 11-ին ընդունված «Գրվելու կանխարգելման հանձնաժողովի մասին» օրենքում նշվում է, որ, մեջբերում եմ, «Գրվելը, գործ տալը, կամ ցուցմունքը հիմք են քաղաքացուն կոտրելու ու ստորացնելու համար»: Միաժամանակ, նույն օրենքի 3-րդ հոդվածի 2.3 կետում նշվում է, որ «Եթե գրվել է արդեն իսկ գրվողի դեմ, այս դեպքում քաղաքացին ազատվում է պատասխանատվությունից»: Փաստացի, օրենքը երկու մոտեցում, երկու ճիշտ է ամրագրում, և նման օրինակները բազմաթիվ են: Այդ իսկ պատճառով ճշտի ինստիտուտը պետք է վերանայել: Շնորհակալություն:

ԽՈՍՆԱԿ. Շնորհակալ ենք, պարոն Միքայելյան: Ձայնը տրվում է ընդդիմադիր «Ճակատային մաս և Սուրբ Հող» խմբակցության քարտուղար Սրապիոն Վանանցյանին:

ՍՐԱՊԻՈՆ ՎԱՆԱՆՑՅԱՆ. Շնորհակալություն: Հարգելի պարոնայք, նախ շեշտեմ, որ ընդդիմությունը կողմ է քվեարկելու սույն փաթեթին: Սակայն, հիմնականում համաձայն լինելով օրենքի ընդունման անհրաժեշտության հետ, մենք նաև մի շարք նկատողություններ ունենք: Առայժմ անդրադառնամ հարցի միայն, այսպես ասած, քաղաքական, գաղափարական մասին: Դեռ նախորդ՝ 11-րդ գումարման ԱԺ-ում մեր պատգամավորներն առաջարկում էին երկու ճշտերի կանոնն ամրագրել օրենսդրությունում, որը դուք՝ իշխանությունը, 4 անգամ մերժել եք: 4 նստաշրջան, ամեն անգամ, մենք պարտաճանաչ ներկայացնում էինք մեր առաջարկությունների փաթեթը Ճշտի և էթիկայի մշտական հանձնաժողով, 4 անգամ էլ մերժել եք: Այդքան կանցավիկ, ճշտի մեռած տղա էիք, ինչու՞ էս 5 տարվա ընթացքում չընդունեցիք: Ես կասեմ ձեզ՝ ինչու: Որովհետև վերջին տարիներին ձեր՝ «Նոյյան տապան և Արարատ» կուսակցության պատճառով ընտրություններին թաղային հեղինակությունների ներգրավման բնականոն ընթացքը խախտվում է: Մեկ ճշտի սկզբունքով ստիպում եք ընտրողին ընտրակաշառքը վերցնել ու քվեարկել միայն ձեր օգտին, որովհետև միակ ճիշտը դա է, տվողից, կներեք արտահայտությանս համար, չեն քցում: Իսկ երկու ճշտերի պարագայում մեկ ճիշտ կլիներ գումարը վերցնելը, իսկ մյուսը՝ մեկ այլ թեկնածուի, այսինքն՝ ընդդիմության օգտին քվեարկելը: Այդ դեպքում ոչ ոք չէր կարողանա քաղաքացուն մեղադրել տվողին քցելու մեջ, որովհետև նա հղում կաներ երկու ճշտերի սկզբունքին:

ԽՈՍՆԱԿ. Պարոն Վանանցյան, երկու ճշտով ճշմարտությունը չի երկատվում: Շնորհակալություն: Խոսքը տրվում է «Նոյյան տապան և Արարատ» խմբակցության անդամ Մարիամ Միսակյանին:

(ԲՂԱՎՈՑ ԸՆԴԴԻՄՈՒԹՅԱՆ ՇԱՐՔԵՐԻՑ) Արա, մեր համար տիկնոջ խոսքը վաբշե ասնավանի չի՛:

ԽՈՍՆԱԿ. Պարոն Մովսիսյան, ըստ «Խոսքի հիմնավորվածության մասին» ՀՀ օրենքի 89-րդ հոդվածի 3-րդ կետի 4.5 ենթակետի, կանայք կարող են նստաշրջանի ընթացքում մեկ դիտարկում անել: Ու նաև՝ պահպանեք կանոնակարգ օրենքի 4-րդ կետը ու պերեբիվատ մի արեք: Եվս մեկ նման դրսևորում՝ ու ստիպված եմ լինելու անշնորհքի աչոտը տամ: Խնդրեմ, տիկին Միսակյան:

ՄԱՐԻԱՄ ՄԻՍԱԿՅԱՆ. Շնորհակալ եմ: Լավ կլիներ, որոշ պատգամավորներ երբեմն օրենք կարդային: Շնորհակալություն, հարգարժան Ազգային ժողով: Պարոն Վանանցյան... նախ... ասելով չի: Այդքան լուրջ արտահայտություններ անելուց առաջ պիտի վստահ լինեք, որ կկարանաք պատասխան տալ: 5 տարի է՝ նույն բանն եք ասում այս բարձր ամբիոնից, 5 տարի մենք ձեզ ասում ենք՝ կարողանում ենք, անում ենք, դուք էլ բաժանեք: Համակերպվեք այն մտքի հետ, որ մեր ախպերները ձեզ ընդամենը մոտիկ տղա են համարում, հերիք է փորձեք ձուկ բռնեք պղտոր ջրում ու չարաշահեք մեր համբերությունը: Ձեր խմբակցության մի քանիսի մասով զրույցներն ընդամենը սառացրած են, մի չարաշահեք իշխանության համբերությունը: Շնորհակալություն:

ԽՈՍՆԱԿ. Համբերությունն անսպառ չէ, սպառվող տեսակն էլ վերանում է: Հայտարարենք ընդմիջում: Բոլորին հրավիրում եմ «Հարսնաքար» համալիր:

Կարող եք անցնել նաև PAN-ի թեստը՝ պարզելու, թե ո՞վ կլինեիք 90-ականների քուչում:

Նիկոլայ Թորոսյան, Արման Գասպարյան /PanARMENIAN.Net
 Ամենաընթերցվողը բաժնում
Հանրային կյանքը՝ Փաշինյանի իշխանության 1 տարում
Սիրո հեղափոխության ամենահեղափոխական սերը
 Ուշադրության կենտրոնում
Անցքը, որից ընկել էր Ստամբոլցյանը, վերջապես կփակեն

Անցքը, որից ընկել էր Ստամբոլցյանը, վերջապես կփակեն Ստամբոլցյանը հաստատեց քաղաքային լեգենդի իսկությունը

 Բաժնի այլ նյութերը
Լանք, թե խնդանք Ինչը ժպիտ պարգևեց վերջին օրերի դրամատիկ իրադարձություններում
Ընթրիքը՝ երկնքում Երևանում կբացվի «օդում ճախրող» ռեստորան