// IP Marketing video - START// IP Marketing video - END
Չվիճարկված ընտրություններ, Մարտի 1-ի գործ ու ՃՏՊ-ներ

Չվիճարկված ընտրություններ, Մարտի 1-ի գործ ու ՃՏՊ-ներ

Հանրային կյանքը՝ Փաշինյանի իշխանության 1 տարում

Թավշյա հեղափոխությանից հետո Հայաստանի հասարակական-քաղաքական կյանքում այնպիսի զարգացումներ ծավալվեցին, որոնց մասին դժվար էր պատկերացնել նախկինում: PanARMENIAN.Net - ը մեկտեղել է 2018-ի ապրիլից ի վեր հանրային կյանքի ուշագրավ դրվագները։

PanARMENIAN.Net - Թոշակների, նպաստների և աշխատավարձերի աճի, հակակոռուպցիոն քաղաքականության, հարկային բարեփոխումների ծրագրերի ու տնտեսական անցուդարձի մասին կարդացեք այստեղ։

Ընտրություններ՝ առանց ընտրակեղծարարության ու 10,000-անոցների

Փաշինյանի իշխանության օրոք երկու ընտրություն անցակվեց՝ մեկը Երևանի ավագանու, մյուսը՝ խորհրդարանական: Դրանք, ըստմիջագային դիտորդական կազմակերպությունների, Հայաստանի երրորդ Հանրապետության ամենափաթանցիկ և արդար ընտրություններն էին, որոնք անցան առանց ընտրակեղծարարության: Առաջին անգամ դրանց արդյունքները չվիճարկվեցին Սահմանադրական դատարանում, չհաջորդեցին ընդդիմության հանրահավաքները:

ԱԺ-ն՝ առանց ՀՀԿ ու ՀՅԴ

2018 թվականի դեկտեմբերի 8-ի արտահերթ խորհրդարանական ընտրություններում ընդամենը մեկ տարի առաջ 54% հավաքած ՀՀԿ-ն անկախ Հայաստանի պատմության մեջ առաջին անգամ չհայտնվեց խորհրդարանում:

Վերջին մոտ 20 տարում առաջին անգամ օրենսդիրում չհայտնվեց նաև ՀՀԿ-ի նախկին կոալիցիոն գործընկեր ՀՅԴ-ն:

Առաջընթաց՝ խոսքի ազատության ոլորտում

«Լրագրողներ առանց սահմանների» միջազգային իրավապաշտպան կազմակերպության՝ մամուլի ազատության ամենամյա զեկույցի համաձայն Թավշյա հեղափոխությունից հետո ՀՀ-ն 180 երկրների ցուցակում զբաղեցրեց 61-րդ տեղը՝ մեկ տարում բարելավելով իր դիրքը 19 կետով:

Ամենախոշոր համաներումը

2018-ի հոկտեմբերին հայտարարվեց Հայաստանի երրորդ Հանրապետության ամենախոշոր համաներումը, որը տարածվեց մոտ 6500 անձի վրա․ մի մասի գործերը կարճվեցին, իսկ 660 հոգի դուրս եկավ բանտերից:

Հանցագործությունների աճ

Համաներման ու ոստիկանության աշխատանքից դժգոհությունների ֆոնին աճեցին հանցագործությունները․ 2018-ին 2017-ի համեմատ հանցագործությունների թիվն աճեց 11.1% - ով։ Չնայած աճի որոշ մասը բաժին է ընկնում կոռուպցիոն հանցագործություններին, որը, ըստ էության, դրական տենդենցի մասին է վկայում, ընդհանուր քրեածին իրավիճակի վատթարացում կա։ Օրինակ՝ բնակարանային գողությունների թիվն աճել է 61.7%-ով:

Մահացությունը ճանապարհներին

2018-ին Ճանապարհային երթևեկության և տրանսպորտային միջոցների շահագործման կանոնները խախտումներն աճեցին 31.9%–ով, իսկ մահվան ելքով ՃՏՊ-ները 25%–ով:

Նշենք, որ Փաշինայնի կառավարության որոշմամբ, ներվեցին 2012 թվականից մինչև 2017 թվականի դեկտեմբերի 31-ը վարորդների նկատմամբ սահմանված ճանապարհային երթևեկության՝ մոտ 14 մլրդ դրամի տուգանքները։

Օրենքը հետապնդում է նախկիններին․․․

ՀՀ նախկին իշխանությունների տասնյակ պաշտոնյաներ Հեղափոխությունից հետո ներգրավվեցին տարբեր քրեական գործերում՝ հիմնականում կոռուպցիոն բնույթի հանցագործությունների և պաշտոնական լիազորությունների չարաշահման մեղադրանքներով: Նրանց թվում է ՀՀ երրորդ նախագահի գրեթե ամբողջ ընտանիքը՝ երկու եղբայրը Ալեքսանդր և Լևոն Սարգսյանները, նրանց բոլոր երեխաները, այդ թվում՝ Նարեկ Սարգսյանը, որը Չեխիայում ՀՀ իրավապահ մարմիններից թաքնվում էր Ֆրանկլին Գոնսալեսի գվատեմալական անձնագրով:

Օրենքով հետապնդվողների թվում են Սարգսյանի անվտանգության նախկին պետ Վաչագան Ղազարյանը, գեներալ Մանվելը, նախկին ՀՀԿ-ական պատգամավոր Միհրան Պողոսյանը, Արամ Հարությունյանը, որն ի դեպ մեղադրվում է ՀՀ պատմությանը հայտնի ամենախոշոր՝ $14 մլն-ի կոռուպցիոն գործարքի մեջ:

․․․ և յուրայիններին

Նոր իշխանություններում նույնպես կան պաշտոնյաներ, որոնք անցնում են քրեական գործերով: Նրանցից է ՀՀ պետական վերահսկողական ծառայության պետ Դավիթ Սանասարյանը, նրա ղեկավարած գերատեսչության երկու վարչության պետերը, ՀՀ առողջապահության փոխնախարար Արսեն Դավթյանը: Վերջերս քրեական գործ է հարուցվել նաև ՀՀ վարչապետ Նիկոլ Փաշինյանի հարազատի նկատմամբ:

Վերաբացված Մարտի 1-ի գործն ու կալանավորված նախագահը

Առաջին անգամ հետխորհրդային տարածքում նախագահ կալանավորվեց: 2008 թվականի Մարտի 1-ին ՀՀ զինված ուժերի քաղաքական գործընթացներին ներգրավմամբ Սահմանադրական կարգը տապալելու մեջ մեղադրվող ՀՀ երկրորդ նախագահ Ռոբերտ Քոչարյանը հայտնվեց ճաղերի հետևում: Մարտի 1-ի գործով մեղադրանք առաջադրվեց նաև ՀԱՊԿ նախկին գլխավոր քարտուղար Յուրի Խաչատուրովին, ՀՀ պաշտպանության նախկին նախարար Սեյրան Օհանյանին, ՀՀ նախկին փոխվարչապետ Արմեն Գևորգյանին:

Սիլվա Համբարձումյանի «ֆենոմենը»

Գործարար Սիլվա Համբարձումյանը որպես վկա է ներգրավված մի շարք աղմկահարույց քրեական գործերում: Պարզվեց, որ նա կաշառք է տվել նախկին բարձրաստիաճան բազամթիվ պաշտոնյաների՝ պաշտոնաթող նախագահներ Քոչարյանին, Սարգսյանին, պատգամավոր Արամ Հարությունյանին, գործարար Սամվել Մայրապետյանին և այլոց:

Գաղտնալսված ԱԱԾ տնօրենը, ՀՔԾ պետը և վարչապետը

2018-ին հրապարակվեց ՀՀ ազգային անվտանգության ծառայության տնօրեն Արթուր Վանեցյանի և ՀՀ հատուկ քննչական ծառայության պետ Սասուն Խաչատրյանի գաղտնալսված հեռախոսազրույցը, որի ընթացքում նրանք քննարկում էին Մարտի 1-ի գործը: Ամիսներ անց հրապարակվեց գաղտնալսման երկրորդ մասը՝ Վանեցյանի և ՀՀ վարչապետ Նիկոլ Փաշինյանի հեռախոսազրույցը նույն թեմայի շուրջ:

«Սասնա ծռերը»՝ ազատության մեջ

Հեղափոխությունից հետո ազատ արձակվեցին Ժիրայր Սեֆիլյանը և 2016 թվականին երեք ոստիկանի սպանությամբ ուղեկցված ՊՊԾ գնդի վրա հարձակման հեղինակ «Սասնա ծռեր» խմբավորման առանցքային անդամները՝ Արայիկ Խանդոյանը (նա մի քանի ամիս անց մահացավ կաթվածից), Պավել Մանուկյանն ու իր որդին, և այլն: Խմբավորման անդամների նկատմամբ քրեական հետապնդումը չի դադարեցվել, նրանց մի մասն էլ շարունակում է պահվել կալանքի տակ:

Սկանդալ՝ ՀԱՊԿ-ում

Յուրի Խաչատուրովին Մարտի 1-ի գործով մեղադրանք առաջադրելով՝ նրան զբաղեցրած պաշտոնից հետ կանչելը տարակուսանք առաջացրեց կառույցի անդամ երկրների մոտ: Առ այսօր կառույցի երկրները չեն կարողացել համաձայնության գալ նոր գլխավոր քարտուղարի նշանակման հարցի շուրջ: Հայաստանը պնդեց, որ նախագահության իր ժամկետը չի լրացրել, ուստի պետք է հաջորդ գլխավոր քարտուղարը նույնպես ՀՀ-ից լինի, իսկ Բելառուսը՝ Ղազախստանի, Ղրղզստանի և Տաջիկստանի աջակցությամբ, առաջադրեց իր թեկնածուին, որին հայկական կողմը հավանություն չի տվել:

Փաշինյան-Ալիև ոչ ֆորմալ հադիպումներ

ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը տարբեր միջազգային ձևաչափերում ոչ ֆորմալ հանդիպումներ ունեցան, միայն վերջերս տեղի ունեցավ երկու երկրի ղեկավարների առաջին պաշտոնական հանդիպումը:

Ոչ ֆորմալ հանդիպումներից ամենաքննարկվածը Դուշանբեինն էր. այստեղ՝ ԱՊՀ երկրների ղեկավարների գագաթաժողովում, կողմերը բանավոր պայմանավորվածություն ձեռք բերեցին սահմանագծում լարումը նվազեցնելու և միջադեպերը կանխելու վերաբերյալ:

«Դուշանբեի վերելակն» ու սահմանի աննախադեպ խաղաղությունը

Դուշանբեում Փաշինյանի և Ալիևի բանավոր պայմանավորվածությունից հետո առաջնագծում հրադադարի ռեժիմի խախտման դեպքերը կտրուկ նվազեցին, ինչը տասնյակ կյանքեր փրկեց: Փաստացի, այդ պայմանավորվածությունից հետո հայկական կողմը չի ունեցել մարտական կորուստներ, ինչն աննախադեպ էր զինադադարի կնքումից ի վեր։

Ժողովուրդներին խաղության պատրաստելը

ԵԱՀԿ ՄԽ համանախագահների ու 2 երկրի ԱԳ նախարարների հանդիպումից հետո հայտարարություն ընդունվեց՝ ժողովուրդներին խաղաղության նախապատրաստելու մասին։ ՀՀ-ում դա ներքաղաքական շահարկումների առիթ դարձավ: Չնայած դրան, կողմերը շարունակում են հարստացնել զինանոցը նորանոր սպառազինություններով։

Երկխոսության նշմարվող եզրեր

Ռազմաքաղաքական մակարդակում Ադրբեջանն ու ՀՀ-ն խաղաղության դեռ չեն պատրաստվում, սակայան սառույցը, կարծես թե, մի փորք տեղաշարժվեց մարդասիրական ոլորտում: ՀՀ այցելեց ադրբեջանցի ամենախոշոր գործակալություններից մեկի գլխավոր խմբագիրը, իսկ Մոսկվայում Մնացականյան-Մամեդյարով վերջին հանդիպումից հետո, կողմերը հայտարարեցին լրագրողների այցերն ու երկու երկրում գերեվարվածների տեսակցությունները թույլատրելու մասին:

Օպերայի սրճարանների աղմկոտ ապամոնտաժումը

Օպերային հարակից տարածքում գտնվող սրճարանները, քաղաքապետարանի որոշմամբ, ապամոնտաժվեցին: Այդ ընթացքում քաղաքապետարանի աշխատակիցներն արժանացան սրճարանատերերի և աշխատակցների կատաղի դիմադրությանը՝ փակվեցին փողոցներ, եղան բերման ենթարկվածներ: Այնուամենայնիվ համայնքին հաջողվեց վերադարձնել քաղաքի այդ հատվածը երևանցիներին:

Օպերային չհանդարտվող կրքերը

Օպերայի շենքին հարակից սրճարանների շուրջ կրքերը մտան շենքից ներս՝ ՀՀ մշակույթի նախարարի պաշտոնակատար Նազենի Ղարիբյաի՝ Օպերայի թատրոնի տնօրեն Կոնստանտին Օրբելյանին պաշտոնից հեռացնելու որոշումից հետո: Թատրոնի աշխատակիցները պահանջեցին պաշտոնակատարի հրաժարականը, հանդիպեցին վարչապետի հետ: Հարցը դեռևս վերջանական լուծում չի ստացել:

Տրասնգենդեր, Շուռնուխ, ծեծված ոստիկան

Սեռական փոքրամասնություններն ու նրանց իրավունքները Հեղափոխությունից հետո իշխող քաղաքական թիմի ընդդիմախոսների կողմից շահարկվող հիմնական թեմաներից են: Դրանք հանրային դիսկուրսում ակտիվացան հատկապես Սյունիքի Շուռնուխ գյուղում տեղի ունեցած միջադեպից հետո, երբ բնակիչները հարձակվել էին միասեռականների խմբի վրա:

Թեման ահագնացավ այն դեպքից հետո, երբ մի շարք միասեռականներ հարձակվեցին Երևանի ոստիկանական բաժանմունքներից մեկի վրա՝ մարմնական վնասվածքներ պատճառելով ոստիկաններին:

Դեպքերն ու քննարկումները կուլմինացիայի հասան ԱԺ-ում տրանսգենդեր քաղաքացու ելույթից հետո: Իշխող «Իմ քայլը» և ընդդիմադիր «Բարգավաճ Հայաստան» խմբակցությունները միմյանց մեղադրեցին կատարվածի համար, ԱԺ-ի մոտ տեղի ունեցան ցույցեր, որի ընթացքում սպառնում էին «ուտիլիզացնել, մահապատժի ենթարկել, հրապակավ այրել և դիլիմ-դիլիմ անել» ոչ ավանդական սեռական կողմոնորոշում ունեցող քաղաքացիներին: ԱԺ-ի մոտ Տեր Ղազար անունով քահանան փորձեց փողոց փակել, պնդեց, որ պետք է օրհնի ԱԺ ամբիոնը, խնկարկի նիստերի դահլիճը: Դրանից հետո եկեղեցին նրան մի քանի օրով փիլոնազրկեց:

Առաքելական եկեղեցու և պետության անհարթ հարաբերությունները

Հեղափոխությունից հետո պետությունն ու Հայ առաքելական եկեղեցին միմյանց նկատմամբ տարբեր առիթներով քննադատական հայտարարություններ արեցին. Փաշինյանը խոսեց ՀԱԵ-ի խնդիրներից, իրենց հերթին իշխանության տարբեր ճյուղերին քննադատեցին եկեղեցականները: Առավել մանրամասն կարդացեք այստեղ:

Նանե Մանասյան / PanARMENIAN.Net
 Ամենաընթերցվողը բաժնում
 Ուշադրության կենտրոնում
Անցքը, որից ընկել էր Ստամբոլցյանը, վերջապես կփակեն

Անցքը, որից ընկել էր Ստամբոլցյանը, վերջապես կփակեն Ստամբոլցյանը հաստատեց քաղաքային լեգենդի իսկությունը

 Բաժնի այլ նյութերը
Լանք, թե խնդանք Ինչը ժպիտ պարգևեց վերջին օրերի դրամատիկ իրադարձություններում
Ընթրիքը՝ երկնքում Երևանում կբացվի «օդում ճախրող» ռեստորան
Ծերացող ազգի «բեռը» Քանի հոգի է աշխատում 1 թոշակառուի թոշակի համար