«Կոկա-Կոլա Հելլենիկ Արմենիա»-ի 20 ամյակը

PanARMENIAN.Net - «Կոկա-Կոլա Հելլենիկ Արմենիա» ընկերութունն աշխարհում ոչ ալկոհոլային զովացուցիչ ըմպելիքներ արտադրող խոշորագույն ընկերություններից մեկի մասնաճյուղն է, որը, լինելով Հայաստանում կոկա-կոլա զովացուցիչների միակ լիազորված շշալցնողը, մեծ ընտրանի է առաջարկում: Մայիսի 10-ի միջոցառմանն ամփոփվել են 20-ամյա գործունեությունն ու ձեռքբերումները:

20 տարվա ընթացքում ընկերությունն ավելի քան 21.5 միլիարդ դրամի ներդրում է արել՝ նպաստելով երկրի տնտեսության զարգացմանը: Ավելի քան 300 մասնագետից բաղկացած մեծ թիմն էլ ուղղակիորեն ներգրավված է «Կոկա-Կոլա Հելլենիկ Արմենիա»-ի առօրյա գործունեությունում, իսկ 11.000-ից ավելի կորպորատիվ հաճախորդներն օգնում են արտադրանքն արագ հասցնել սպառողին: Ինչպես միջոցառման ընթացքում նշեց ընկերության գլխավոր տնօրեն Սայյորա Այուպովան, աշխատակիցներն ընկերության հարստությունն են:

«Աշխատանքի ենք վերցնում բուհերի շրջանավարտների, ուղարկում նրանց արտասահման` սովորելու ու լավագույն փորձը Հայաստան բերելու: Իհարկե, Հայաստանում և տարածաշրջանի մյուս երկրներում որոշ դժվարություններ կան, բայց մենք կենտրոնանում ենք հնարավորությունների վրա»:

Իր հերթին «Կոկա-Կոլա Հելլենիկ» ընկերության տարածաշրջանային տնօրեն Քիթ Սանդերսը, անդրադառնալով Խմբում «Կոկա-Կոլա Հելլենիկ Արմենիա»-ի գործունեությանը, նշեց, որ ընկերությունն ընտանիքի կարևոր անդամն է:

«Հպարտ ենք հայաստանյան մեր թիմի ձեռքբերումներով: Մասնագետների ջանքերի շնորհիվ` Հայաստանում արդեն 20 տարի գործող ընկերության արտադրած ըմպելիքներն առանձնանում են միջազգային ամենաբարձր չափանիշներին համապատասխանող որակով»,- ասաց Սանդերսը՝ 20-ամյա հոբելյանի առթիվ «Կոկա-Կոլա Հելլենիկ Արմենիա»-ին նորանոր ձեռքբերումներ մաղթելով:

Միջոցառմանը ներկա Հայաստանի արդյունաբերողների և գործարարների միության նախագահ Արսեն Ղազարյանը, որն Ընկերությանը պարգևատրեց Հայաստանի արդյունաբերողների և գործարարների ոսկե մեդալով, ընդգծեց՝ իր ղեկավարած միության մոնիթորինգային խումբն ուսումնասիրել է շուկան ու ոլորտը և առանձնացրել «Կոկա-Կոլա Հելլենիկ Արմենիա»-ի աշխատանքը բնական ռեսուրսների վերարտադրության, էներգիայի խնայման, տեղական համայնքների զարգացման ու բնակչության շրջանում առողջ ապրելակերպի հաստատման գործում:

«1996-ին ամերիկյան այս բրենդի մուտքը հայկական շուկա բարձրացրեց որակի ստանդարտների, սպասարկման, շուկայում աշխատելու, օրինական դաշտում աշխատելու, ինչպես նաև սոցիալական պատասխանատվության սանդղակը: Ընկերությունը ոչ միայն արտադրում է, վաճառում ու շահույթ ստանում, այլև լրջորեն զբաղվում է շրջակա միջավայրի պաշտպանությամբ, ջրային ռեսուրսների ռացիոնալ օգտագործմամբ, համայնքների զարգացման հարցով»,- նշեց Ղազարյանը՝ հավելելով. «նաև զովացուցիչ հաճույք է պատճառում»:

Իր հերթին Երևանի Կենտրոն վարչական շրջանի ղեկավար Արա Սադոյանը նշեց, որ 2014 թվականին «Կոկա-Կոլա Հելլենիկ Արմենիա»-ի հետ համայնքների զարգացման ծրագրի շրջանակում մայրաքաղաքի փոքր կենտրոնում խաղահրապարակ են բացել:

«Շատ ողջունելի է այն աշխատանքը, որ ընկերությունը նախաձեռնում է և կյանքի կոչում: «Կոկա-Կոլա Հելլենիկ Արմենիա»-ն միջազգային խոշոր ընկերություն է, որն իր մեծ լուման ունի Հայաստանի տնտեսության, այդ թվում՝ Երևանի զարգացման գործում»:

Միջոցառմանը ներկա էկոնոմիկայի փոխնախարար Գարեգին Մելքոնյանը նշեց, որ «Կոկա-Կոլա Հելլենիկ Արմենիա»-ի մասշտաբի խոշոր միջազգային ընկերությունների գործունեությունը Հայաստանում նոր բիզնես մշակույթ է բերում երկիր:

«Ընկերությունն իր 20 տարվա գործունեությամբ ապացուցում է, որ Հայաստանում նման միջազգային ընկերությունները կարող են ոչ միայն տարիներ շարունակ զարգացնել բիզնեսը, այլև օրինակ ծառայել մյուսների համար»:

Հայաստանում գործող ընկերությունը 3 տարի ղեկավարած (2002-2005թթ.) Կոնստանտինոս Սպանուդիսը նկատեց՝ այն տարիների ընթացքում, որ այստեղ չի եղել, մեր երկիրը շատ է փոխվել, Երևանն էլ ամբողջությամբ այլ քաղաք է դարձել. «Մեր բիզնեսը Հայաստանում ծաղկել է երկրին զուգահեռ, ինչը կարևոր ձեռքբերում է»:

Հյուրերի թվում էր նաև Ամերիկյան առևտրի պալատի նախագահ Տիգրան Ջրբաշյանը, որն առանձնացրեց՝ «Կոկա-Կոլա Հելլենիկ Արմենիա»-ն Հայաստանում հունական խոշոր բիզնեսի առաջին ներկայացուցիչն էր և որոշիչ դեր է խաղացել տնտեսության ձևավորման և բիզնեսի զարգացման տեսակետից:

«Ընկերության մի շարք աշխատակիցներ հետագայում տեղափոխվեցին այլ ոլորտներ: Եվ, կարելի է ասել, որ «Կոկա-Կոլա Հելլենիկ Արմենիա»-ն դարձավ այն ընկերություններից, որը կրթեց վաճառքի, կառավարման ոլորտում աշխատող նոր սերնդին»:

«Կոկա-Կոլա Հելլենիկ Արմենիա»-ն մոտ 8 տարի ղեկավարած Գագիկ Դանիելյանի խոսքով, ընկերության հաջողության գրավականն այն է, որ 20 տարվա ընթացքում կարողացել են հասնել գործընկերների հետ փոխշահավետ գործակցության՝ հասկանալով և բավարարելով միմյանց կարիքները` միաժամանակ նպաստելով բիզնեսի զարգացմանը:

«Գործընկերների հետ մեր աշխատանքն ի սկզբանե միտված է եղել տարիների գործակցության, ոչ թե կարճ ժամանակում շահույթ ստանալու: Այսօր բիզնես գործընկերներ ունենք, ում հետ արդեն մոտ 20 տարի աշխատում ենք, այսինքն՝ կարողացել ենք ճիշտ ընտրություն կատարել»:

Ընկերության հետ 10 տարուց ավելի գործակցող «Օրրան» բարեգործական հասարակական կազմակերպության հիմնադիր Արմինե Հովհաննիսյանի խոսքով՝ բախտավոր են, որ «Կոկա-Կոլա Հելլենիկ Արմենիա»-ի պես գործընկեր ունեն, քանի որ նաև ընկերության շնորհիվ է, որ ամեն տարի կարողանում են կարիքավոր երեխաներին ապահովել տաք սննդով, կրթությամբ և անհրաժեշտ այլ ծառայություններով:

Միջոցառմանը ներկա էին և ելույթ ունեցան նաև Հայաստանում Հունաստանի ու ԱՄՆ դեսպանները, որոնք ողջունեցին ընկերության 20 տարվա նվաճումներն ու նորանոր հաջողություններ մաղթեցին հետագա գործունեությունում: «Կոկա-Կոլա Հելլենիկ Արմենիա»-ի աշխատակիցները նույնպես միացան շնորհավորանքներին՝ մաղթելով շարունակել կերտել պատմություն ու երջանկություն պարգևել իր սպառողներին:

Ավազե անիմացիոն շոուով և համերգային ծրագրով ուղեկցվող երեկոն ավարտվեց տոնական տորթը կտրելու արարողությամբ: